ՀՀ ազգային ժողովը երկրորդ ընթերցմամբ եւ ամբողջությամբ ընդունել է Արտոնագրերի մասին օրենքի եւ կից ներկայացված օրենքների նախագծերի փաթեթը, որով, ի թիվս այլ փոփոխությունների, առաջարկվում է հնարավորություն ստեղծել ավելի արագ եւ քիչ ծախսերով ստանալ գյուտի արտոնագիր՝ 10 տարի ժամկետով:
«Զենքի մասին» ՀՀ օրենքում լրացում կատարելու մասին» նախագիծը քննարկելով՝ Ազգային ժողովը մարտական զենք կրելու իրավունք է տվել Պետեկամուտների կոմիտեի աշխատակիցներին։
Տրամադրվող զենքը նախատեսվում է օգտագործել օպերատիվ-ծառայողական խնդիրների լուծման, օպերատիվ-հետախուզական գործունեության՝ մաքսանենգությունը բացահայտելու եւ խափանելու համար:
Զենք կրելու իրավունք ունեցող աշխատակիցների եւ զենքերի ցանկը սահմանվելու է ՀՀ կառավարության որոշմամբ:
ԱԺ-ն ընդունել է նաեւ «Տոների եւ հիշատակի օրերի մասին» օրենքում լրացում կատարելու մասին օրենքի նախագիծը, որով առաջարկվում է հոկտեմբերի առաջին կիրակին նշել որպես Հայաստանի ազգային փոքրամասնությունների օր: