ՀՀ եւ ՌԴ կառավարությունների համագործակցությամբ «Ճամփորդի՛ր առանց Covid-19-ի» էլեկտրոնային ծրագրի ժամկետը երկարացվել է մինչեւ ապրիլի 1-ը: Ծրագրի միջոցով երկու երկրի սահմանային անցակետերում, լաբորատոր թեստի բացասական արդյունքի հիման վրա, մեկնողը կկարողանա հատել երկրի սահմանն ու ժամանել ՌԴ:
ՌԴ մեկնելուց առաջ անհրաժեշտ է հեռախոսի մեջ ներբեռնել «Ճամփորդի՛ր առանց Covid-19-ի» հավելվածը: Քաղաքացին պետք է անձնագրով դիմի ծրագրում ընդգրկված ՊՇՌ թեստավորում իրականացնող լաբորատորիա, տրամադրի անհրաժեշտ տվյալները, որոնք լաբորատորիան կներմուծի «Ազատ տեղաշարժ» պետական տեղեկատվական էլեկտրոնային հարթակ եւ քաղաքացուն կտրամադրի համակարգից գեներացված համաձայնագիր` երկչափ պաշտպանված գծիկային կոդով (QR կոդ):
Թռիչքից առավելագույնը 72 ժամ առաջ առաջ մեկնողը պետք է հավաստիանա, որ բջջային հավելվածում թեստի արդյունքների մասին տեղեկությունը կա, եւ ամսաթիվը համապատասխանում է մեկնելու ժամկետին։ Սահմանը հատելիս ներկայացվում է բջջային հավելվածի QR կոդը։
Ի դեպ, հավելվածի նոր տարբերակը հնարավորություն է տալիս ճամփորդող ընտանիքի բոլոր անդամների Covid-19 թեստի արդյունքները պահպանել մեկ հավելվածում: