Ռուսաստանի արտգործնախարար Սերգեյ Լավրովն այսօր երկօրյա աշխատանքային այցով կլինի Երեւանում եւ կհանդիպի Հայաստանի իշխանության ներկայացուցիչների հետ:
ՌԴ ԱԳՆ պաշտոնական ներկայացուցիչ Մարիա Զախարովան նշել է, որ հանդիպումների առաջնային թեման կլինի Լեռնային Ղարաբաղի վերաբերյալ առկա համաձայնագրերի իրականացումը:
Բանակցությունների ընթացքում հանգամանորեն կքննարկվի երկկողմ եւ տարածաշրջանային համագործակցության, ինչպես նաեւ միջազգային ասպարեզում փոխգործակցության հարցերի լայն շրջանակ:
Ըստ Զախարովայի՝ առաջնահերթ ուշադրություն է դարձվելու Ռուսաստանի, Ադրբեջանի եւ Հայաստանի ղեկավարների նախորդ տարվա նոյեմբերի 9-10-ի եւ այս տարվա հունվարի 11-ի Լեռնային Ղարաբաղի վերաբերյալ հայտարարությունների իրականացման գործնական ուղղություններին:
Ապրիլի 1-ին Լավրովը Մոսկվայում առանձին հանդիպումներ էր ունեցել Հայաստանի եւ Ադրբեջանի արտգործնախարարներ Արա Այվազյանի եւ Ջեյհուն Բայրամովի հետ:
Լեռնային Ղարաբաղի հիմնախնդիրը քննարկվել է նաեւ Լավրովի եւ Իրանի արտգործնախարար Մոհամադ Ջավադ Զարիֆի՝ ապրիլի 13-ին Թեհրանում կայացած հանդիպման ժամանակ:
Մայիսի 9-10-ին ՌԴ արտգործնախարարը կլինի Բաքվում: