Ռուսաստանի պաշտպանության նախարարությունից հայտնել են, որ խաղաղապահ զորախմբի զինծառայողներն ապահովել են Արցախի Հանրապետության տարածքով մարդասիրական բեռով երկու ավտոշարասյան անվտանգ ուղեկցումը։
Ռուս ռազմական ոստիկանները շինարարական նյութերով եւ պարենով բեռնված շուրջ 20 միավոր մեքենայից բաղկացած ավտոշարասյուն են ուղեկցել դեպի Մատաղիս-Գետավան-Վանք եւ հակառակ ուղղություններով:
Ռուսական զորակազմի ներկայացուցիչ Միխայիլ Կիրիլենկոն նշել է, որ ռազմական ոստիկանության ստորաբաժանման ուժերով ապահովվել է Մատաղիս-Վանք երթուղով անցնող ավտոշարասյան անվտանգությունը։ Նա հավելել է, որ երթուղին անցնում է լեռնային տեղանքով, ինչը մեծ ուշադրություն է պահանջում տրանսպորտային միջոցների վարորդներից եւ ուղեկցող անձնակազմերից: Երթուղու երկարությունը 42 կմ է, երկու ուղղություններով ուղեկցվել է մոտ 20 միավոր տեխնիկա։
Երթուղով երթեւեկելիս ավտոմոբիլային շարասյունը հատել է ավտոմեքենաների անվտանգությունն ապահովող 3 դիտակետ: