Press Emblem Campaign (PEC) շվեյցարական ոչ կառավարական կազմակերպության տվյալներով 2022-ի սկզբից ի վեր աշխարհի 15 երկրներում զանգվածային լրատվամիջոցների առնվազն 38 աշխատակից է սպանվել:
Միայն Ուկրաինայում եւ Մեքսիկայում այս տարի արդեն զոհվել է իննական լրագրող:
PEC-ն անհանգստություն է հայտնել 2022 թվականի առաջին երեք ամսում սպանված լրագրողների վերաբերյալ: Հունվարից մարտ ժամանակահատվածում հաղորդումներ են ստացվել զանգվածային լրատվամիջոցների 15 աշխատողների մահվան մասին:
2022-ին զոհերի թիվը 2021-ի նույն ժամանակահատվածի համեմատությամբ աճել է ավել քան երկուսուկես անգամ:
PEC-ի նախագահ Բլեզ Լամպանը նշել է, որ իրադրության վատթարացման հիմնական պատճառներից են պատերազմը Ուկրաինայում եւ հանցավորության մոլեգնումը Մեքսիկայում:
Զանգվածային լրատվամիջոցների երեք աշխատակից է սպանվել Հաիթիում, նույնքան՝ Հնդկաստանում եւ Պակիստանում, երկուսը՝ Եմենում: Հունվար–մարտին մամուլի մեկական աշխատակցի սպանություն է արձանագրվել ինը պետությունում, մասնավորապես՝ Բրազիլիայում, Գվատեմալայում, Հոնդուրասում, Ղազախստանում, Մյանմայում, ԱՄՆ-ում, Թուրքիայում, Ֆիլիպիններում եւ Չադում:
2004-ին հիմնադրված Press Emblem Campaign-ը ՄԱԿ-ին կից խորհրդակցական կարգավիճակ ունի: Կազմակերպության զեկույցի համար տեղեկատվության աղբյուր են ծառայում մամուլի, ՄԱԿ-ի եւ ոչ կառավարական կազմակերպությունների հաղորդումները: PEC-ը ՄԱԿ-ին լրագրողների պաշտպանությունն ուժեղացնելու վերաբերյալ կոնվենցիա ընդունելու կոչ է արել: