Հայաստան-ԱՄՆ ռազմավարական երկխոսության համատեղ հայտարարություն 2022
Հայաստան-ԱՄՆ ռազմավարական երկխոսության ամփոփիչ նիստի առթիվ կողմերը հանդես են եկել համատեղ հայտարարությամբ։
Պետքարտուղարի եվրոպական եւ եվրասիական հարցերով տեղակալ Դոնֆրիդը վերահաստատել է, որ Միացյալ Նահանգները կշարունակի իր ամուր աջակցությունն ու համագործակցությունը Հայաստանի կառավարության հետ՝ պատասխանատու ժողովրդավարական եւ տնտեսական ինստիտուտների կառուցման գործում, որոնք կարտացոլեն ընդհանուր արժեքները եւ կապահովեն ավելի արդյունավետ կառավարում եւ բարեկեցություն:
Պատվիրակությունները համապարփակ երկխոսություն են ունեցել Հայաստանի դրական ժողովրդավարական ուղուն սատարելուն ուղղված ԱՄՆ աջակցության շուրջ։ Այն ներառում է մարդու իրավունքների, մեդիագրագիտության, սոցիալական պաշտպանության, արդարադատության ոլորտի բարեփոխումների եւ Ոստիկանության նոր պարեկային ծառայության աջակցության ծրագրեր: Պատվիրակությունները քննարկել են նաեւ դատական իշխանության անաչառության եւ խոսքի ազատության ամրապնդմանն առնչվող հարցեր։
Քննարկման առանցքային թեմաներից էին նաեւ տնտեսական ոլորտում փոխադարձ բարեկեցությանը նպաստող մեխանիզմները՝ ներառյալ էներգետիկ համագործակցությունն ու աշխատուժի զարգացումը՝ առեւտուրի ու ներդրումների ոլորտում երկկողմ կապերը խթանելու եւ խորացնելու նպատակով:
Անվտանգություն, խաղաղություն եւ տարածաշրջանային հակամարտությունների կարգավորում
Երկու պատվիրակությունները քննարկել են հարցեր, որոնք վերաբերում են սահմանային անվտանգությանը եւ պաշտպանության ու անվտանգության ոլորտում գործընկերությանը` աղետների կառավարման, պաշտպանական բարեփոխումների, բժշկական աջակցության եւ խաղաղապահության միջոցով: Պատվիրակությունները մտքեր են փոխանակել անվտանգության հարցերի շուրջ եւ նշել Միացյալ Նահանգների դերը՝ որպես ԵԱՀԿ Մինսկի խմբի համանախագահ երկրի` օժտված Լեռնային Ղարաբաղի հակամարտության խաղաղ կարգավորմանը նպաստելու մանդատով:
Շոշափելի արդյունքների հասնելու ձգտում
Նախարար Միրզոյանը եւ հայկական պատվիրակությունը կառուցողական հանդիպումներ են ունեցել նաեւ ԱՄՆ Միջազգային զարգացման գործակալության կառավարիչ Սամանտա Փաուերի, պետքարտուղարի քաղաքական հարցերով տեղակալ Վիկտորիա Նուլանդի եւ այլոց հետ։ Վաշինգտոնում գտնվելու ընթացքում պատվիրակության անդամները ստորագրել են մի շարք փաստաթղթեր, այդ թվում՝ Քաղաքացիական միջուկային էներգիայի ոլորտում համագործակցության վերաբերյալ, որը կծառայի որպես մեխանիզմ, որի միջոցով երկու կառավարությունները կարող են ավելի ամուր կապեր հաստատել միջուկային ոլորտի փորձագետների, արդյունաբերության եւ հետազոտողների միջեւ: Հայաստանը եւ Միացյալ Նահանգները ստորագրել են նաեւ հակակոռուպցիոն եւ իրավապահ ոլորտում բարեփոխումների երկու համատեղ գործողությունների ծրագիր։