Ըստ «Ալիք Մեդիա Վրաստան»-ի՝ Վրաստանի նախագահ Սալոմե Զուրաբիշվիլին գերմանական Deutsche Welle-ին տված հարցազրույցում հայտարարել է, որ Վրաստանի անվտանգության երաշխիքը ՆԱՏՕ-ին ու Եվրամիությանն անդամակցությունն է։
Զուրաբիշվիլին նշել է, որ Վրաստանը չի կարողանա պատերազմի միջոցով ստանալ անվտանգության այդ երաշխիքները, քանի որ չի կարողանա հաղթել Ռուսաստանի դեմ պատերազմում:
«Այն, ինչ մեզ իրականում անհրաժեշտ է, ՆԱՏՕ-ին եւ Եվրամիությանը միանալու արագ եւ կարճ ճանապարհն է, քանի որ դա կարեւոր է մեր անվտանգության համար»,- ասել է Զուրաբիշվիլին։
Ավելի վաղ Գերմանիայի կանցլեր Օլաֆ Շոլցը գերմանական ZDF հեռուստաալիքին տված հարցազրույցում հայտարարել է, որ Ուկրաինային եւ Վրաստանին ՆԱՏՕ ընդունելուց հրաժարվելը ճիշտ էր, այդ հարցը դրված չէր եւ դրված չէ օրակարգում։
Դեռեւս հունվարին ՌԴ փոխարտգործնախարար Սերգեյ Ռյաբկովի եւ ԱՄՆ պետքարտուղարի օգնական Կարեն Դոնֆրիդի հանդիպման ժամանակ Ռուսաստանը պաշտոնապես ԱՄՆ-ին էր փոխանցել երկու փաստաթուղթ` պայմանագիր եւ համաձայնագիր: Առաջարկվող փաստաթղթերը ներառում էին անվտանգության երաշխիքների մասին Ռուսաստանի գաղափարները։
Պահանջների թվում էին երաշխիքներ Ռուսաստանին առ այն, որ ՆԱՏՕ-ն այլեւս չի ընդլայնվի դեպի արեւելք եւ օրակարգից կհանի Ուկրաինայի եւ Վրաստանի անդամակցության հարցը: Ռուսաստանը պահանջել է նաեւ, որ Հյուսիսատլանտյան դաշինքը հրաժարվի 1997-ին գոյություն ունեցող ՆԱՏՕ-ի սահմաններից դուրս ենթակառուցվածքային օբյեկտների ստեղծումից: