FLYONE ARMENIA ընկերությունից հայտնել են, որ Թուրքիայի ավիացիոն իշխանություններն իրեն չեն տրամադրել Թուրքիայի օդային տարածքով դեպի եվրոպական երկրներ չվերթերի իրականացման (overflight) հնարավորություն։
Ընկերությունում նշել են, որ ստեղծված իրավիճակի հետեւանքով իրենք ստիպված են մինչեւ հունիսի 10-ը չեղարկել Երեւան-Լիոն-Երեւան եւ Երեւան-Փարիզ-Երեւան ուղղություններով չվերթերը: Երեւան-Ստամբուլ-Երեւան երթուղով չվերթերը կիրականացվեն ըստ չվացուցակի։ Չվերթերի վերսկսման վերաբերյալ համապատասխան տեղեկություն կտրվի։
Ավիաընկերությունն ուղեւորներին որպես այլընտրանք առաջարկել է՝ թռիչքի ամսաթվի փոփոխություն, Credit Shell Գումարի 110%–ի չափով վերադարձ հաճախորդի FLYONE անձնական հաշիվ, միայն տոմսեր, գնված կայքում կամ հավելվածում, չեղարկված թռիչքի՝ տոմսի, գումարի ամբողջական վերադարձ։
Եթե տոմսը գնվել է տուրիստական գործակալությունից, ավիաընկերությունը խնդրում է կապ հաստատել գործակալության հետ՝ ընտրելու ներկայացված այլընտրանքներից մեկը։