Լիբանանում Հայաստանի դեսպանությունից հայտնել են, որ 2022-ի հուլիսի 5-ից Լիբանանի քաղաքացիները կարող են ՀՀ մուտքի արտոնագիր ստանալ ՀՀ սահմանին։
Եգիպտոսում Հայաստանի դեսպանությունից եւս հայտնել են, որ 2022-ի հուլիսի 11-ից Եգիպտոսի քաղաքացիների համար պարզեցվում է վիզային ռեժիմը։ Եգիպտոսի քաղաքացիները ՀՀ ոստիկանության կամ արտաքին գործերի նախարարության կողմից տրված հրավերի կարիք չեն ունենա։ Նրանք կարող են վիզայի համար դիմել անմիջապես Եգիպտոսում Հայաստանի Հանրապետության դեսպանություն կամ Հայաստանի Հանրապետության ցանկացած այլ դիվանագիտական ներկայացուցչություն։
Եգիպտոսի քաղաքացիները կարող են մուտքի արտոնագրի համար դիմել էլեկտրոնային վիզաների համակարգի միջոցով։
Դրանից բացի՝ Եգիպտոսի քաղաքացիները կարող են մուտքի արտոնագիր ստանալ Հայաստանի սահմանային հսկողության ցանկացած կետ ժամանելուն պես, եթե ունեն կացության կարգավիճակ կամ վիզա հետեւյալ երկրներում՝ ԵՄ անդամ պետություններ, Շենգենյան գոտու երկրներ, ԱՄՆ, Ավստրալիա, Նոր Զելանդիա, Կորեայի Հանրապետություն, Մեծ Բրիտանիայի եւ Հյուսիսային Իռլանդիայի Միացյալ Թագավորություն, Կանադա, Ռուսաստան, Ճապոնիա, Սաուդյան Արաբիա, Քուվեյթ, ԱՄԷ, Կատար, Բահրեյն, Օման։