Yahoo News-YouGov-ի անցկացրած հարցման տվյալներով՝ Միացյալ Նահանգների բազմաթիվ ընտրողներ այն կարծիքին են, որ ԱՄՆ գործող նախագահ Ջո Բայդենի կամ երկրի նախկին նախագահ Դոնալդ Թրամփի երկրորդ նախագահական ժամկետը «վատագույն» տարբերակը կլիներ երկրի համար:
Հարցվածների 37%-ը երկրի համար «վատագույն» տարբերակ է համարում 2024-ին Թրամփի վերընտրվելը, 35%-ը նույնը հայտարարել է Բայդենի մասին: Ճշտվում է, որ այն մարդկանց թվում, որոնք դեմ են հանդես գալիս Թրամփի վերընտրվելուն, 85%-ը դեմոկրատներ են, իսկ 25%-ը՝ հանրապետականներ: Բայդենի համար երկրորդ նախագահական ժամկետին դեմ են դեմոկրատների 43%-ը, հանրապետականների 84%-ը: Դրա հետ մեկտեղ Թրամփին աջակցություն է հայտնել հարցման մասնակիցների 39%-ը, Բայդենին աջակցում է 41%-ը:
Դեմոկրատների 30%-ը պատրաստ է պաշտպանելու փոխնախագահ Քամալա Հարիսի թեկնածությունն այն դեպքում, եթե Բայդենն իր թեկնածությունը չառաջադրի, իսկ Հարիսն առաջադրի իր թեկնածությունը: Ընտրողների 52%-ը հայտարարել է, որ կցանկանար՝ փոխնախագահի փոխարեն Դեմոկրատական կուսակցությունից թեկնածու լիներ ուրիշ մեկը:
Միեւնույն ժամանակ հանրապետականների շրջանում 44%-ը հայտարարել է, որ կաջակցեր Թրամփին, իսկ հարցվածների մոտ մեկ երրորդը կնախընտրեր Հանրապետական կուսակցությունից որպես նախագահի թեկնածու տեսնել նահանգապետ Ռոն Դեսանտիսին: Հարցումն անցկացվել է հուլիսի 28-ից օգոստոսի 1-ը, մասնակցել է 155 հազար 700 չափահաս ամերիկացի։
YouGov-ը բրիտանական միջազգային ինտերնետի վրա հիմնված շուկայական հետազոտությունների եւ տվյալների վերլուծական ընկերություն է, որի գլխամասային գրասենյակը Մեծ Բրիտանիայում է եւ գործում է Եվրոպայում, Հյուսիսային Ամերիկայում, Մերձավոր Արեւելքում եւ Ասիա-Խաղաղօվկիանոսյան տարածաշրջանում: 2007-ին YouGov-ը ձեռք է բերել ամերիկյան Polimetrix ընկերությունը, իսկ 2017-ի դեկտեմբերից պատկանում է շուկայի ուսումնասիրության ավստրալիական Galaxy Research ընկերությանը։