Գյումրիում երեկ տոնեցին Գեղարվեստի պետական ակադեմիայի Գյումրու մասնաճյուղի 25-ամյակը։ Հանդիսավոր միջոցառմանը ներկա էին նախկին ու ներկա ակադեմիացիներ, արվեստագետներ, հյուրեր Հայաստանից եւ արտերկրից։
Ակադեմիայի տնօրեն նկարիչ Վահագն Ղուկասյանն ասաց, որ քառորդդարյա հոբելյանի միջոցառումների շարքի մեկնարկը դեռ անցած տարվանից էր տրվել․ բազմաբնույթ միջոցառումներ, զեկույցներ, վարպետության դասեր, ցուցադրություններ, արվեստի բակի հիմնում եւ կյանքի կոչված այլ ծրագրեր ոչ միայն Շիրակում, այլեւ հանրապետության տարածքում եւ արտերկրում։
«Այս ամենի մեջ մեր հիմնական ուղղությունն ու նպատակը ուսանողն է եւ բարձրագույն կրթության որակը, ինչի շնորհիվ այսօր ունենք տարեցտարի ավելացող ուսանողներ, որոնք մեր քաղաքի վաղվա օրվա վառ գույներն են լինելու»։
Հայաստանի գեղարվեստի պետական ակադեմիայի ռեկտոր Արամ Իսաբեկյանը նշեց, որ բուհի մասնաճյուղն ունի որակ եւ ավերջ աճելու ջիղ։
Գերմանիայի դաշնային հանրապետության Շիրակի եւ Լոռու մարզերի պատվո հյուպատոս Ալեքսան Տեր-Մինասյանը շնորհավորեց ներկաներին եւ նշեց, որ ակադեմիայի Գյումրու մասնաճյուղը մեր երկրին տվել է բազմաթիվ ականավոր արվեստագետների, որոնք դարձել են քաղաքի դեմքերը։
«Գյումրին այսօր նորաձեւ է իր արվեստագետներով, ստեղծագործական միջավայրով։ Ակադեմիան այսօր պատրաստում է ամենապահանջված մասնագետների՝ ստեղծագործող մարդկանց։ Ստեղծագործողի կարիքն ունեն բոլոր բնագավառները»։
Միջոցառումը եզրափակվեց ակադեմիայի Գյումրու մասնաճյուղի «Արտ տարածք» արվեստի քննադատական հանդեսի առաջին համարի շնորհանդեսով, որը բաց հարթակ է ոչ միայն ակադեմիայի, այլեւ բոլոր արվեստագետների համար։
Առաջին մասնագիտությամբ բանասեր, երկրորդով՝ հոգեբան, լրագրությունը, սակայն, երրորդը չէ։ Լրագրությունը բոլոր մասնագիտություններից ամենասիրելին է։