Ըստ BBC-ի՝ Անգլիայի բանկը ներկայացրել է բրիտանական ֆունտ ստեռլինգի նոր թղթադրամները, որոնց վրա պատկերված է նոր միապետ Չարլզ 3-րդ թագավորը։ 2024-ից սկսած՝ այդ դրամանիշներով կփոխարինվեն հանգուցյալ Եղիսաբեթ 2-րդի դիմապատկերով թղթադրամները։ 5, 10, 20, եւ 50 ֆունտ ստեռլինգ անվանական արժեքով թղթադրամների դիզայնում միայն միապետի դիմապատկերի փոփոխությունն է արվել։ Թղթադրամի ձախ կողմում պատկերված է Չարլզ 3-րդի դեմքը հանգուցյալ Եղիսաբեթ 2-րդի դեմքի փոխարեն։
Անգլիայի բանկը հայտարարել է, որ անցանկալի ձգձգումներից եւ խնդիրներից խուսափելու համար թղթադրամների փոփոխությունը կիրականացվի աստիճանաբար, ու մինչ ամբողջական փոխարինումը Եղիսաբեթ 2-րդի եւ Չարլզ 3-րդի դիմապատկերներով թղթադրամները զուգահեռաբար կշրջանառվեն։ Չարլզ 3-րդի դիմապատկերով մետաղադրամներն արդեն շրջանառության մեջ են։
Պատրաստեց Արման Գրիգորյանը