Ֆրանսիացի ավելի քան մեկ տասնյակ քաղաքական առաջնորդներ համատեղ նամակ են հրապարակել Le Monde օրաթերթում` նախագահ Էմանուել Մակրոնին հորդորելով անհապաղ միջամտել Հայաստանի եւ Արցախի շուրջը գործընթացներին՝ կանխելու համար անուղղելին:
Ֆրանսիայի խորհրդարանի երկու պալատների ներկայացուցիչները նկարագրել են Ադրբեջանի շրջափակման մեջ հայտնված Արցախում տիրող իրավիճակը․ հումանիտար մեծ աղետի վտանգ, 120 հազար մարդ, որոնց թվում՝ 30 հազար երեխա, զրկված է կենսական պաշարներից՝ ներառյալ սննդից եւ բժշկական անհրաժեշտ միջոցներից։
Նամակի հեղինակները շեշտում են, որ ստեղծված իրավիճակը 2020-ից ի վեր հայերի, ընդ որում՝ ինչպես Արցախի, այնպես էլ Հայաստանի քաղաքացիների դեմ Ադրբեջանի հարձակումների սրման նոր փուլի սկիզբն է, եւ Բաքվի գործողություններն իրենց հիմք են տալիս ենթադրելու, որ Ադրբեջանը կանգ չի առնելու, ցանկացած առիթ օգտագործելու է՝ հալածելու հայերին էթնիկ զտման նպատակով:
Թվարկելով հայերի դեմ Բաքվի գործողությունները՝ պատերազմական հանցագործությունները, Հայաստանի ինքնիշխան տարածքի բռնազավթումը, էթնիկ ատելության քարոզը, մշակութային ժառանգության ոչնչացումը, խաղաղ բնակչության դեմ կրկնվող հանցագործությունները, ֆրանսիացի օրենսդիրները նկատում են, որ ցանկացած այլ հանգամանքներում Ֆրանսիան կմիջամտեր։
Քաղաքական սկզբունքային տարաձայնություններ ունեցող օրենսդիրները շեշտել են, որ անգամ իրենք են մի կողմ դրել քաղաքական մրցակցությունը՝ Հայաստանին եւ Արցախին աջակցություն հայտնելու համար, եւ խոստովանել են, որ Ֆրանսիան իր այդ ճիչը հնչեցրեց ավելի քան մեկ դար ուշացումով։ Մինչդեռ ֆրանսիացի հայտնի քաղաքական գործիչ եւ մտավորական Ժան Ժորեսը դեռ 1896 թվականին էր կոչ անում փրկելու հայերին՝ Ֆրանսիային մեղադրելով թափված արյանը, անմարդկային եւ վայրագ արարքներին լուռ, հետեւաբար՝ մեղսակից» լինելու համար:
Ֆրանսիական առաջատար քաղաքական ուժերի առաջնորդները Մակրոնին մի շարք քայլեր են հուշել․ դատապարտել Ադրբեջանին միջազգային իրավունքի դրույթների խախտման, Հայաստանի տարածքի բռնազավթման, պատերազմական ոճրագործությունների համար, Արցախում նախատեսել հումանիտար ներկայություն, Հայաստանին ցուցաբերել անհապաղ տնտեսական օգնություն, հանդիպել Արցախի ներկայացուցիչների հետ, Եվրամիության եւ Միացյալ Նահանգների գործընկերներին համոզել ձեռնարկել նույն քայլերը եւ միասին Ադրբեջանի նկատմամբ պատժամիջոցներ սահմանել:
Ֆրանսիացի օրենսդիրները երկրի նախագահին հորդորել են աշխատել Ստեփանակերտի օդանավակայանի գործարկման եւ ՄԱԿ-ի Անվտանգության խորհրդի կողմից միջազգային խաղաղապահ զորախումբ ուղարկելու ուղղությամբ:
Ֆրանսիացի պատգամավորները համոզված են՝ Էմանուել Մակրոնը կարող է կանխել պատմության կրկնությունը եւ ապացուցել, որ Ֆրանսիան ազատ է եւ կարող է ձերբազատվել քաղաքական կամ տնտեսական կարճատես ռազմավարություններից հանուն իր հումանիստական իդեալների պաշտպանության: