ԵՄ արտաքին քաղաքականության եւ անվտանգային հարցերով բարձր հանձնակատար Ժոզեպ Բորելը չի բացառել, որ Ուկրաինային կարող են մատակարարվել ռազմական կործանիչ ինքնաթիռներ։ Նա նշել է, որ այս հարցում արեւմտյան մի շարք երկրներ, այդ թվում՝ Գերմանիան եւ Միացյալ Նահանգները, ունեն բավականին զուսպ դիրքորոշում։
Բորելը նաեւ հիշեցրել է, որ Ուկրաինային յուրաքանչյուր նոր ռազմական օգնության տրամադրումից առաջ խոսել է Ռուսաստանի եւ Ուկրաինայի միջեւ զինված հակամարտության հետագա սրացման առնչությամբ իր մտավախությունների մասին։
Նա չի պատասխանել այն հարցին, թե ինքն անձամբ հավանություն կտա արդյոք Ուկրաինային ռազմական կործանիչ ինքնաթիռներ մատակարարելուն։ «Իմ խնդիրը կոնսենսուսի հասնելն է»,- ասել է ԵՄ դիվանագիտական ծառայության ղեկավարը՝ հավելելով, որ այս իրավիճակում սխալ կլինի բացահայտ կերպով այս կամ այն դիրքորոշումն ունենալ, որպեսզի գործընթացը չխաթարվի։