Պոլսահայ «Ակոս» թերթի խմբագիր Բագրատ Էստուկյանը հայտնել է, որ Թուրքիայի Հաթայ քաղաքում փետրվարի 20-ին երկու ուժեղ երկրաշարժի հետեւանքով փետրվարի 6-ի ցնցումներից հետո վնասված բազմաթիվ շենքեր վերջնականապես հողին են հավասարվել։ Էստուկյանն ընդգծել է, որ փետրվարի 20-ի երկրաշարժից մահացած 8 քաղաքացիներից 3-ը գնացել էին իրենց բնակարաններ, որպեսզի որոշ ապրանքներ դուրս բերեն։ Էստուկյանը հավելել է, որ շատերը լքել են աղետի գոտին, սակայն շատերը շարունակում են այնտեղ մնալ։ Նրանք հիմնականում վրաններում են ապրում։ «Ակոս»-ի խմբագիրը նշել է նաեւ, որ այլ երկրներից օգնություն ցուցաբերելու համար Թուրքիա ժամանած փրկարարական ջոկատների մեծ մասն արդեն վերադարձել են իրենց հայրենիք, սակայն մի մասը դեռեւս շարունակում է աշխատել աղետի գոտում։
Կ. Պոլսի Հայոց Պատրիարքարանից հայտնել են, որ Թուրքիայի Հաթայ նահանգում փետրվարի 20-ի երկրաշարժերի հետեւանքով զգալիորեն վնասվել են Թուրքիայի միակ հայկական գյուղի՝ Վաքըֆի շենքերն ու շինությունները։ Վնասվել են գյուղի հայկական Սուրբ Աստվածածին եկեղեցու զանգակատունը եւ նախկին հյուրանոցի պատերը։ Մարդկային կորուստներ չկան։ Ըստ Բերիո Հայոց թեմի ազգային առաջնորդարանի «Գանձասար» պաշտոնաթերթի՝ Սիրիայի Արաբական Հանրապետության հայաբնակ Քեսաբ քաղաքի Սուրբ Աստվածածին եկեղեցին, որը փետրվարի 6-ին ավերիչ երկրաշարժից վնասվել էր, փետրվարի 20-ի երկրաշարժի հետեւանքով կրկին վնասվել է:
Թուրքիայի Անթաքիա քաղաքից 9 կմ ու Սիրիայի Լաթաքիա բնակավայրից 75 կմ հեռավորության վրա փետրվարի 20-ին Երեւանի ժամանակով 21.05-ին գրանցվել էր 6,4 մագնիտուդով նոր երկրաշարժ, որին հաջորդել էր մի քանի քանի հետցնցում, դրանցից ամենաուժգինը` 5,8 մագնիտուդ։ Երկրաշարժի օջախը 2 կմ խորության վրա է։ Ցնցումները զգացվել են նաեւ Լիբանանում, Իսրայելում ու Կիպրոսում։