Լաչինի միջանցքի շուրջը ստեղծված եւ հայ-ադրբեջանական սահմանին իրավիճակը գնահատելու նպատակով փետրվարի 17-19-ը Հայաստան կատարած այցից հետո Եվրոպայի խորհրդի խորհրդարանական վեհաժողովի (ԵԽԽՎ) Հայաստանի մոնիտորինգի համազեկուցողներ Կիմմո Կիլյունենը (Ֆինլանդիա) եւ Բորիանա Օբերգը (Շվեդիա) հանդես են եկել հայտարարությամբ: Համազեկուցողներն իրենց այցի ընթացքում այցելել են Ջերմուկ, Գորիս եւ Վարդենիս քաղաքներ եւ հարակից տարածքներ, ինչպես նաեւ Լաչինի միջանցքի մուտքը հայկական կողմից: Նրանք հանդիպել են Լաչինի միջանցքի շարունակվող շրջափակման պատճառով Գորիսում արգելափակված տեղի պաշտոնյաների եւ Լեռնային Ղարաբաղի բնակիչների հետ։
Հորդորում են միանալ Լաչինի միջանցքի ապօրինի շրջափակումն անհապաղ դադարեցնելու իրենց կոչին
ԵԽԽՎ համազեկուցողները, ընդգծելով, որ իրավիճակը Լաչինի միջանցքում պահանջում է անհապաղ գործողություններ, հիշեցրել են Մարդու իրավունքների եվրոպական դատարանի 2022-ի դեկտեմբերի 21-ի եւ Արդարադատության միջազգային դատարանի 2023-ի փետրվարի 22-ի որոշումները՝ Վեհաժողովի բոլոր անդամ երկրներին հրավիրելով ստեղծված իրավիճակը հասցնել իրենց համապատասխան ազգային խորհրդարանների ուշադրությանը եւ միանալ Լաչինի միջանցքի ապօրինի շրջափակումը անհապաղ դադարեցնելու իրենց կոչին։
Բարձր են գնահատել սահմանին ԵՄ քաղաքացիական առաքելության ծավալումը
Անդրադառնալով Հայաստանի եւ Ադրբեջանի սահմանին տիրող իրավիճակին՝ ԵԽԽՎ համազեկուցողներն ուսումնասիրել են Ջերմուկ քաղաքում եւ Սոթք գյուղում քաղաքացիական ենթակառուցվածքների վրա ադրբեջանական զորքերի հարձակումների հետեւանքները։ «Արձանագրեցինք, որ քաղաքացիական գոտիներում կասետային զինամթերքի կիրառման ապացույցները հավաքվել եւ պահպանվել են հետագա փորձաքննության համար։ Մեզ ցույց տվեցին ադրբեջանական ռազմական դիրքերի առկայությունը Հայաստանի ինքնիշխան տարածքում, երբեմն վիճելի սահմանագծից շատ հեռու»,- նշել են ԵԽԽՎ համազեկուցողները՝ բարձր գնահատելով սահմանին Եվրամիության քաղաքացիական առաքելության ծավալումը եւ նշել նախորդ առաքելության զգալի շոշափելի արդյունքները լարվածության նվազեցման գործում։
Վերահաստատել են խորհրդարանական մակարդակով քաղաքական աջակցությունը ցուցաբերելու պատրաստակամությունը
Համազեկուցողները երկու կողմերին կոչ են անում առաջ մղելու սահմանի սահմանազատման շուրջ քննարկումները եւ պայմանավորվել սահմանից զորքերի հայելային հետքաշման մասին՝ որպես վստահության ամրապնդման անհապաղ քայլ։ «Մեր եզրակացությունների մասին կհայտնենք ԵԽԽՎ մոնիտորինգի կոմիտեին նրա հաջորդ նիստում։ Նախկինի պես խիստ ուշադիր ենք վերաբերվում ապագա իրադարձություններին եւ վերահաստատում մեր պատրաստակամությունը խորհրդարանական մակարդակով ցուցաբերել այն ամբողջ քաղաքական աջակցությունը, որն անհրաժեշտ է երկարաժամկետ խաղաղ կարգավորման հասնելու համար»,- եզրափակել են ԵԽԽՎ համազեկուցողները։