Ըստ բրիտանական BBC-ի՝ ի պատասխան Ֆրանսիայի մայրաքաղաքում էլեկտրական սկուտերների պատճառով մարմնական վնասվածքների եւ մահվան դեպքերի աճի, ապրիլի 2-ին անցկացվել է էլեկտրական սկուտերների վարձույթն արգելելու վերաբերյալ հանրաքվե։ Փարիզն առաջին քաղաքներից մեկն էր, որտեղ տարածվել են մարտկոցով աշխատող մեքենաները, սակայն քննադատների պնդմամբ, երթեւեկության միջով կամ մայթերին 27 կմ/ժ արագություն զարգացնող էլեկտրական սկուտերներն ավելի շատ վնաս են հասցնում, քան օգուտ տալիս: Սկուտեր վարողները հաճախ սաղավարտ չեն դնում, իսկ օրինական կարգով սկուտեր վարձելու իրավունք ունեն նույնիսկ 12 տարեկան երեխաները:
2021-ին Փարիզում մահացել էր 31-ամյա ոմն իտալուհի, երբ նրան հարվածել էր երկու մարդու տանող էլեկտրական սկուտերը։ Կինն ընկել էր եւ գլուխը հարվածել մայթեզրին: Սակայն էլեկտրական սկուտերների օպերատորները փաստարկներ էին բերում, թե սկուտերները Փարիզում տեղի ունեցող վթարների աննշան մասն են կազմում: 2019-ին ընդունված օրենքով սկուտեր վարողը պետք է տեսանելի հագուստով լինի։ Երթեւեկությանը հակառակ վարելու համար սահմանվել է 135 եվրո, իսկ սահմանված արագությունը գերազանցելու համար՝ մինչեւ 1500 եվրո տուգանք:
Թեեւ հանրաքվեին մասնակցել է քվեարկելու իրավունք ունեցողների միայն 8%-ը կամ Փարիզի ընտրական ռեգիստրում գրանցված 1,38 միլիոն մարդկանցից 103 հազարը, այդուհանդերձ, նրանց ավելի քան 91 հազարը կամ գրեթե 90%-ը քվեարկել է սկուտերների արգելման օգտին։