ԱՄՆ պետքարտուղարության խոսնակի առաջին տեղակալ Վեդանտ Պատելը ճեպազրույցում անդրադարձել է տեղեկությանը, որ Էնթոնի Բլինքենը մտադիր է հաջորդ շաբաթ ընդունել Հայաստանի եւ Ադրբեջանի արտգործնախարարներ Արարատ Միրզոյանին եւ Ջեյհուն Բայրամովին: Պատելը նշել է, որ հանդիպման հստակ ժամկետներ հայտնել չի կարող, սակայն ակնկալում են, որ Վաշինգտոնում մինչեւ այս ամսվա վերջ բանակցությունների եւս մեկ փուլ կանցկացվի:
«Կողմերը ձգտում են Հարավային Կովկասում խաղաղ ապագա կառուցելու: Բազմիցս կրկնել ենք՝ երկխոսությունն առկա խնդիրների լուծման եւ տեւական ու արժանապատիվ խաղաղության հասնելու բանալին է: Միացյալ Նահանգները ողջունում է երկու երկրների ղեկավարների՝ վերջերս անցկացված հանդիպումը, ինչպես նաեւ այն փաստը, որ Հայաստանի եւ Ադրբեջանի միջեւ բանակցությունները շարունակվում են տարբեր հարթակներում»,- նշել է Պատելը։