Հարավային Աֆրիկայում ԿԽՄԿ տարածաշրջանային պատվիրակության ղեկավարի տեղակալ Մուցա Մուգանգավարին հայտնել է, որ Կարմիր խաչի միջազգային կոմիտեն սպասում է, որ միջազգային դոնորներն առաջիկա երկու տարում կկրճատեն մարդասիրական նախագծերի ֆինանսավորումը: Նա հավելել է, որ տարեցտարի ավելի դժվար է դառնում ոչ նպատակային միջոցներ ներգրավելը, ինչը դժվարացնում է մոռացված ճգնաժամերի ֆինանսավորումը: Ըստ նրա՝ կոմիտեն պետք է հարմարվի նոր իրողություններին, առաջիկա ամիսներին վերանայի իր գործունեությունն ու առաջնահերթությունները ինչպես տեղերում, այնպես էլ ԿԽՄԿ կենտրոնակայանում:
Միեւնույն ժամանակ Մուգանգավարին հույս է հայտնել, որ դոնորների աջակցությամբ ԿԽՄԿ-ն այնուամենայնիվ կկարողանա ավելի շատ միջոցներ ներգրավել 2023-ի իր կարեւորագույն մարդասիրական գործողությունների համար: Նրա կարծիքով` Կարմիր խաչը չպետք է մոռանա նաեւ այլ ձգձգվող զինված հակամարտությունների մասին, որոնք, օրինակ, շարունակվում են Աֆրիկայի Սահելշրջանում եւ Սոմալիում, որտեղ բռնության աճ է նկատվում, որը սրվում է երկարատեւ երաշտի հետեւանքների պատճառով։
Դեռ 2020-ի նոյեմբերին Կարմիր խաչի միջազգային կոմիտեի նախագահ Պետեր Մաուրերը հայտնել էր, որ կազմակերպությունը մտադիր է 400-500 աշխատակից ուղարկել տարածաշրջան: Կարմիր խաչը նախատեսում էր Երեւանի, Ստեփանակերտի եւ Բաքվի գրասենյակներից բացի ստեղծել նորը։ Մտադրություն կար ավելացնելու նաեւ կազմակերպության ֆինանսավորումը. եթե նախքան պատերազմը Կարմիր խաչի՝ տարածաշրջանին հատկացվող տարեկան բյուջեն 10 միլիոն շվեյցարական ֆրանկ էր, հաջորդ տարի այն կլինի 45 միլիոն:
1863 թվականին հիմնադրված Կարմիր խաչի միջազգային կոմիտեն մարդասիրական կազմակերպություն է, որի կենտրոնակայանը գտնվում է Շվեյցարիայի Ժնեւ քաղաքում։ Կազմակերպությունը ձգտում է օգնելու ամբողջ աշխարհում հակամարտություններից եւ զինված բռնություններից տուժած մարդկանց: ԿԽՄԿ-ն ֆինանսավորվում է կամավոր ներդրումներից, որոնց մեծ մասը տալիս են կառավարությունները, ինչպես նաեւ մասնավոր աղբյուրները: