Հայաստանի վարչապետ Նիկոլ Փաշինյանը հայ-ադրբեջանական սահմանին աճող լարվածության հարցը քննարկել է Ֆրանսիայի նախագահ Էմանուել Մակրոնի, այնուհետեւ Գերմանիայի Դաշնային Հանրապետության կանցլեր Օլաֆ Շոլցի հետ: Զրույցը Ֆրանսիայի եւ Գերմանիայի առաջնորդների հետ տեղի է ունեցել Լաչինի միջանցքի ապօրինի արգելափակման հետեւանքով Լեռնային Ղարաբաղում հումանիտար ճգնաժամի խորացման, ինչպես նաեւ Հայաստանի հետ սահմանին եւ Լեռնային Ղարաբաղի մերձակայքում Ադրբեջանի կողմից զինտեխնիկայի եւ կենդանի ուժի կուտակման մասին տագնապալի հաղորդագրությունների համատեքստում:
Ֆրանսիայի նախագահ հետ հեռախոսազրույցի ժամանակ ՀՀ վարչապետ Փաշինյանը հայտնել է, որ պատրաստ է լարվածությունը նվազեցնելուն ուղղված հրատապ քննարկումներ ունենալ Ադրբեջանի նախագահի հետ: Էմանուել Մակրոնը վերահաստատել է իր հանձնառությունը` ջանքերն ուղղել Լեռնային Ղարաբաղում հումանիտար ճգնաժամի լուծմանը եւ հակամարտության արդարացի ու կայուն կարգավորմանը՝ միջազգային իրավունքին համապատասխան: Ֆրանսիայի նախագահը կողմերին կոչ է արել բոլոր տարաձայնությունները լուծելու միայն դիվանագիտական ճանապարհով:
Գերմանիայի կանցլեր Շոլցը իր հեթին նշել է, որ պատրաստակամ է աջակցելու տարածաշրջանում խաղաղության եւ կայունության հաստատմանն ուղղված ջանքերին: Կանցլերի մամուլի եւ տեղեկատվության գրասենյակն ավելի ուշ հաղորդագրություն է տարածել Գերմանիայի կանցլեր Օլաֆ Շոլցի եւ Հայաստանի վարչապետ Նիկոլ Փաշինյանի հեռախոսազրույցի վերաբերյալ։ Նշվբում է, որ կանցլերը խոր մտահոգություն է հայտնել վերջին շաբաթների ընթացքում կայուն աճող լարվածության, մասնավորապես՝ ռազմական միավորումների տեղաշարժման առնչությամբ՝ խստորեն կոչ անելով զերծ մնալ ռազմական ցանկացած էսկալացիայից։ «Այժմ անհրաժեշտ է արագ համաձայնություն ձեռք բերել Լեռնային Ղարաբաղի ժողովրդին հումանիտար օգնության ցուցաբերման հարցում, դրանց թվում՝ Լաչինի միջանցքի բացման։ Հայաստանի եւ Ադրբեջանի միջեւ հակամարտությունը կարող է լուծվել միայն դիվանագիտական ճանապարհով. այժմ բոլորը պետք է առանց հապաղելու կառուցողական աշխատեն այդ նպատակի ուղղությամբ»,- ասված է Գերմանիայի կառավարության մամուլի եւ տեղեկատվության գրասենյակի հաղորդագրության մեջ: