Սպիտակ տունը հաստատել է Իրաքում եւ Սիրիայում իրանական օբյեկտների դեմ մի շարք հարվածներ հասցնելու ծրագրերը՝ ի պատասխան հունվարի 28-ին Հորդանանում ամերիկյան ռազմաբազայի վրա հարձակման: Այս մասին հաղորդում է ամերիկյան CBS News-ը՝ վկայակոչելով ԱՄՆ նախագահ Ջո Բայդենի վարչակազմի պաշտոնյաներից ստացված տեղեկատվությանը։
Այդ հարվածները, ըստ ամերիկացի պաշտոնյաների, կիրականացվեն մի քանի օրվա ընթացքում եւ, հավանաբար, կախված կլինեն եղանակային պայմաններից:
ԱՄՆ-ի զինված ուժերը կարող են հարվածներ հասցնել վատ եղանակին, սակայն նախընտրում են ընտրված թիրախների լավ տեսանելիությունը՝ խաղաղ բնակիչներին չվնասելու համար, հավելել են աղբյուրները CBS News-ին՝ չհաստակեցնելով, թե որ թիրախներն են ընտրվել հարվածների համար։
Հիշեցնենք, որ հունվարի 28-ին ամերիկյան ԶԼՄ-ների, այդ թվում նաեւ CBS-ի տվյալներով, անօդաչու թռչող սարքերի կիրառմամբ հարվածներ էին հասցվել Հորդանանի տարածաքում տեղակայված «Թաուեր 22» կոչվող ամերիկյան ռազմաբազայի ենթակառուցվածքներին, ինչի հետեւանքով զոհվել էին 3, վիրավորվել՝ 40 զինվորական։
Չնայած ամերիկյան կողմից հնչած պնդումներին Հորդանանի Հաշիմյան Թագավորության հաղորդակցության նախարար եւ կառավարության խոսնակ Մուհաննադ Մուբայդինը հարձակումից ժամեր անց հայտարարել է, որ այն տեղի է ունեցել Սիրիայի տարածքում՝ Հորդանանի հետ սահմանին մոտ գտնվող Ալ-Տանֆում տեղակայված ԱՄՆ ռազմակայանի դեմ։
«ԱՄՆ զինվորականների դեմ հարձակումը տեղի է ունեցել Հորդանանի տարածքից դուրս` Սիրիայում, Ալ—Տանֆ բազայի վրա»,-ընդգծել էր Մուբայդինը։
Նույն օրը երեկոյան հնչեցրած ելույթի ժամանակ նախագահ Ջո Բայդենը կրկնելով, որ հարձակումը տեղի է ունեցել Հորդանանի տարածքում ասել է, որ այն իրականցրել են Իրանի Իսլամական Հանրապետության աջակցությունը ստացող աշխարհազորային զորամիավորումները։
«Չնայած մենք դեռ հավաքում այս հարձակման մասին բոլոր փաստերը, այնուամենայնիվ մենք գիտենք, որ այն իրականացնողները Սիրիայում եւ Իրաքում գործող արմատական զինված խմբավորումներն են եւ աջակցություն են ստանում Իրանից։ Վստահեցնում եմ,, որ բոլոր մեղավորները պատասխանատվության կենթարկվեն, այնպես` ինչպես հարկ ենք համարում»,-ասել է Բայդենը։
Իրանի արտգործնախարարության պաշտոնական ներկայացուցիչ Նասեր Քանաանին իր հերթին հունվարի 29-ին տված մամուլի ասուլիսի ժամանակ ամերիկյան ռազմակայանի դեմ հարձակման մեջ Թեհրանի ունեցած ներգրավվածության մասին պնդումները «անհիմն» է որակել։ Նա նաեւ հավելել էր, որ տարածաշրջանում գործող աշխարահազորային ռազմականացված ուժերը, որոնք հայտնի են «Դիմադրության առանցք» հավաքական անվանումով, «իրենց որոշումներում եւ գործողությունների իրականացման համար հրամաններ չեն ստանում Իրանի Իսլամական Հանրապետությունից»։
Քանաանիի խոսքերով ԱՄՆ-ի շարունակվող հարվածները Սիրիայի եւ Իրաքի ուղղությամբ, ինչպես նաեւ Գազայի հատվածում ընթացող պատերազմը միայն նպաստում են Մերձավոր Արեւելքում անկայունության խորացմանը: