Ադրբեջանի նախագահի օգնական եւ աշխատակազմի արտաքին քաղաքականության բաժնի ղեկավար Հիքմեթ Հաջիեւը հայտարարել է, որ հայկական կողմը 30 տարի շարունակ Արցախը «աղտոտել» է ակններով։
«Հայաստանի 30-ամյա ռազմական օկուպացիայի արդյունքում օկուպացիայից ազատագրված Ադրբեջանի տարածքները հայկական կողմից խիստ աղտոտվել են ականներով»,-ասել է Հաջիեւը՝ ապրիլի 4-ին ելույթ ունենալով Ականազերծման իրազեկման եւ ականազերծմանն աջակցության միջազգային օրվա առթիվ։
Ադրբեջանի նախագահի օգնականի խոսքերով ականների առկայությունը դեռ շարունակում է խոչնդոտել ադրբեջանցի փախստականների վերադարձին։
«Ականները՝ պատերազմի պայթուցիկ մնացորդները եւ ինքնաշեն պայթուցիկ սարքերը շարունակում են սպանել եւ վիրավորել մեր խաղաղ բնակիչներին՝ խոչընդոտելով վերականգնմանն ու վերակառուցմանը եւ ներքին տեղահանվածների վերադարձին։ Զոհված խաղաղ բնակիչների թվում կան երեխաներ»,-ասել է Հաջիեւը:
Ականների վերաբերյալ հայտարարություն տարածել է նաեւ Ադրբեջանի արտգործնախարարությունը։ Դրանում Բաքուն կրկին պնդում է, որ 2020 թվականի 44 օրյա պատերազմից հետո հայկական կողմը Լաչինի «ճանապարհը» օգտագործել է ակններ տեղափոխելու եւ տեղադրելու համար։
Հայտարարության տեքստում նաեւ նշվում է, որ 2023 թվականի սեպտեմբերի 19-20-ը Արցախի դեմ իրականացրած ռազմական գործողություններից հետո, իբր հայտնի է դարձել շփման գծի երկայքով շուրջ 500 հազար ակնների տեղադրման փաստ։
Ադրբեջանի ԱԳ նախարարության համաձայն հետպատերազմյան ժամանակշրջանում ակնների պայթունից տուժել է 350 ադրբեջանցի։ Նրանցից ընդհանուր առմամբ զոհվել է 65-ը, որոնցից, ըստ ադրբեջանական կողմի, 50-ը եղել են քաղաքացիական անձինք, իսկ 15-ը՝ զինվորականներ։