Թուրքիայի արտգործնախարարությունը Հայաստանին կոչ է անում Ադրբեջանին հանձնել ականապատ տարածքների հստակ քարտեզները։ Այս մասին ասված է Թուրքիայի արտաքին գործերի նախարարության հայտարարության մեջ, որը նվիրված է Ականազերծման իրազեկման եւ Ականազերծման գործում աջակցության միջազգային օրվան։
«Մենք կիսում ենք այնպիսի երկրների անվտանգության մտահոգությունները, ինչպիսիք են Աֆղանստանը, որը երկար ժամանակ վտանգված է ականներով, եւ Ադրբեջանը, որի ազատագրված տարածքները լի են բազմաթիվ չհայտնաբերված ականներով: Կոչ ենք անում Հայաստանին ականների ճշգրիտ քարտեզները հանձնել Ադրբեջանին»,-ասվում է Թուրքիայի ԱԳՆ հայտարարության տեքստում։
Դրանում նաեւ նշվում է Անկարան շարունակելու է աջակցել ականների վտանգի դեմ պայքարող երկրներին, ինչպես տեղում, այնպես էլ միջազգային հարթակներում:
«Թուրքիայի ականազերծման կենտրոնի միջոցով մենք աջակցում ենք միջազգային համագործակցությանը Օտտավայի կոնվենցիայի շրջանակներում հակահետեւակային ականների օգտագործման, պահեստավորման, արտադրության, տեղափոխման արգելմանը եւ դրանց ոչնչացմանը»,-ասվում է հայտարարության տեքստում։