Մինչ ողջ աշխարհը իր հայացքը սեւեռել է Ուկրաինայի դեմ Ռուսաստանի անօրինական պատերազմի վրա, աշխարհաքաղաքական մեկ այլ մեծ տեղաշարժ է տեղի ունենում Հարավային Կովկասում: Նման միտք հայտնել է ՆԱՏՕ-ի նախկին գլխավոր քարտուղար Անդերս ֆոգ Ռասմուսենը ֆրանսիական Le Monde-ի համար գրված հոդվածում։
«Չնայած Ռուսաստանից պատմական, տնտեսական, էներգետիկ եւ ռազմական կախվածության, եւ իր տարածքում հազարավոր ռուսական զորքերի ֆիզիկական ներկայության, Հայաստանի կառավարությունը համարձակ եւ համաձայնեցված ջանքեր է գործադրել՝ ժողովրդավարությունը ամրապնդելու եւ ժողովրդավարական Արեւմուտքի հետ ավելի սերտ հարաբերություններ կառուցելու համար»,-գրել է Ռասմուսենը։
Նա նշում է, որ չնայած կողմնորոշման վերափոխումը որոշակի ժամանակ է պահանջում, այնուամենայնիվ Եվրոպական միությունից պահանջում է «ավելի հավակնոտ ռազմավարություն որդեգրել Հայաստանի ժողովրդավարության նկատմամբ»: Ըստ Ռասմուսենի դա պետք է սկսել Հայաստանի եւ Ադրբեջանի միջեւ ԵՄ-ի չեզոք դերակատարման թյուր ըմբռնման վերացումից:
«Եվրոպան պետք է միջնորդի դեր ստանձնի կայուն խաղաղության համաձայնագրի շուրջ բանակցություններում, բայց նրա մոտեցումը պետք է արտացոլի այն իրականությունը, որ Հայաստանն ընտրել է եվրոպական ժողովրդավարական երկրների համայնքը, մինչդեռ Ադրբեջանը նստած մնալ ագրեսիվ բռնապետների ճամբարում»,-կարծում է ՆԱՏՕ-ի նախկին գլխավոր քարտուղարը։
Ըստ Ռասմուսենի ԵՄ-ի հստակության եւ հավակնությունների բացակայությունը կարող է վտանգել Հայաստանի ժողովրդավարությունը եւ նրա աշխարհաքաղաքական առանցքը:
Նրա գնահատմամբ ԵՄ նոր մոտեցումը պետք է սկսվի Եվրահանձնաժողովի նախագահ Ուրսուլա ֆոն դեր Լեյենի, Հայաստանի վարչապետ Նիկոլ Փաշինյանի եւ ԱՄՆ պետքարտուղար Էնթոնի Բլինկենի Բրյուսելում ապրիլի 5-ին սպասվող եռակողմ գագաթնաժողովից։
Ռասմուսենը հիշեցրել է, որ Հայաստանը արդեն փաստացի սառեցրել է իր անդամակցությունը Ռուսաստանի գլխավորած Հավաքական անվտանգության պայմանագրի կազմակերպությանը, զորավարժություններ է անցկացրել ԱՄՆ-ի հետ եւ ձգտում է ամրապնդել տնտեսական կապերը ժողովրդավարական երկրների հետ։
«2023 թվականին Լեռնային Ղարաբաղի վրա Ադրբեջանի հարձակումից հետո, ինչպես նաեւ Հայաստանի ներսում ադրբեջանական ուժերի կողմից ռազմավարական բարձունքների շարունակական օկուպացումից հետո, Հայաստանում անվտանգային իրավիճակը փխրուն է»,-ասվում է ՆԱՏՕ-ի նախկին գլխավոր քարտուղարի հոդվածում։