«Crocus City Hall»-ում տեղի ունեցած ահաբեկչության հետ Ուկրաինայի կապ ունենալու մասին Ռուսաստանի հայտարարությունները անհեթեթություններ են։ Այս մասին հայտարարել է Ֆրանսիայի նախագահ Էմանուել Մակրոնը՝ մեկնաբանելով Ֆրանսիայի պաշտպանության նախարար Սեբաստյան Լեկորնուի եւ ՌԴ ռազմական գերատեսչության ղեկավար Սերգեյ Շոյգուի ապրիլի 4-ին տեղի ունեցած հեռախոսազրույցը։
Ըստ ՌԴ ՊՆ-ի՝ հայտարարության հեռախոսազրույցի ընթացքում «Ֆրանսիայի պաշտպանության նախարարը ցավակցություն է հայտնել «Crocus City Hall» համերգասրահում տեղի ունեցած ահաբեկչության համար, որից հետո «փորձել է համառորեն համոզել, որ Ուկրաինան եւ արեւմտյան երկրները ներգրավված չեն ահաբեկչության մեջ ՝ պատասխանատվությունը դնելով «Իսլամական պետության» վրա»։
Զրույցի մասին հաղորդագրության մեջ ՌԴ ՊՆ-ն կրկին պնդում է, որ «ըստ տեղեկությունների ահաբեկչության կազմակերպման մեջ առկա է ուկրաինական հետք»։
«Հուսով ենք, որ տվյալ դեպքում ֆրանսիական հատուկ ծառայությունները կանգնած չեն դրա հետեւում»,- հայտնում է մամուլի ծառայությունը՝ մեջբերելով Սերգեյ Շոյգուի խոսքերը։
Այս հայտարարություններին ի պատասխան Մակրոնը ռուսական կողմի հայտարարությունները «տարօրինակ եւ սպառնալից» է որակել։
«Ծիծաղելի է հայտարարելը, որ դրա հետեւում Ֆրանսիան կամ Ուկրաինան է կանգնած։ Սա անհեթեթություն է։ Սա չի համապատասխանում իրականությանը։ Դա տեղեկատվական մանիպուլացիայի շահարկում է, որը մտնում է ռուսական ռազմական զինանոցի մեջ»,-ասել է Ֆրանսիայի նախագահը։
Մակրոնը նշել է, որ Ֆրանսիան «օգտակար տեղեկատվություն» է փոխանցել Ռուսաստանին «Crocus City Hall»-ի վրա հարձակման կազմակերպիչների մասին։
«Ես խնդրել եմ համապատասխան նախարարությունների ծառայությունների ղեկավարներին տեխնիկական զրույցներ վարել իրենց [ռուս] գործընկերների հետ՝ համերաշխություն հայտնելու եւ այն բանի համար, որ մենք օգտակար տեղեկատվություն ունեինք այս հարձակման ծագման եւ կազմակերպման մասին»,-ասել Ֆրանսիայի նախագահը։