Ադրբեջանի նախագահ Իլհամ Ալիեւը ապրիլի 3-ին ԱՄՆ պետքարտուղար Էնթոնի Բլինքենի հետ հեռախոսազրույցի ժամանակ անընդունելի է համարել մարդու իրավունքների թեմայի օգտագործումը Ադրբեջանի ներքին գործերին միջամտելու համար։ Այս մասին ասվում է Ադրբեջանի նախագահի մամուլի ծառայության տարածած հայտարարության մեջ։
«Մենք մերժում ենք երկակի ստանդարտների վրա հիմնված արեւմտյան մի շարք երկրների կանխակալ գնահատականները։ Այս առնչությամբ մեր պետության ղեկավարը պետքարտուղար Էնթոնի Բլինքենին հիշեցրել է Հայաստանում ընդդիմության ներկայացուցիչների ձերբակալությունների, կալանավորման ընթացքում մահվան դեպքերի, մարդու իրավունքների խախտումների մասին եւ նշել, որ այս համատեքստում արեւմտյան երկրների լռությունը երկակի ստանդարտների վառ օրինակ է»,-ասվում է հայտարարության մեջ։
Ավելին, հայտարարության տեքստում նաեւ նշվում է, որ Ալիեւը անգամ բարձրացրել է հայտնի լրագրող Ջուլիան Ասանժի «երկար ժամանակ ֆիզիկական եւ հոգեկան խոշտանգումների է ենթարկվել հենցը՝ իր լրագրողական գործունեության պատճառով»։
«Մարդու իրավունքների խնդիրը պետք է դիտարկել ոչ միայն տեղական, այլեւ համաշխարհային համատեքստում»,-ըստ հաղորդագրության ԱՄՆ պետքարտուղարի հետ զրույցի ժամանակ ասել է Ալիեւը։