Վրաստանի վարչապետ Իրակլի Կոբախիձեն 2008-ի օգոստոսյան պատերազմի մեկնարկի համար մեղադրել է երկրի նախորդ իշխանություններին։ Նա նման հայտարարություններով հանդես է եկել պատերազմի 16-րդ տարելիցի կապակցությամբ Մուխաթգվեդիի եղբայրական գերեզմանատուն կատարած այցից հետո՝ լրագրողների հետ զրույցում։
«Ազգային շարժումը» ստորագրել է Եվրախորհրդի (Խորհրդարանական վեհաժողովի) բանաձեւը, ըստ որի՝ իրենք են սկսել օգոստոսյան պատերազմը […] Գլխավորն այն է, որ ամբողջությամբ հետաքննության ենթարկվի Սաակաշվիլիի «Ազգային շարժման» ռեժիմի 2008-ին իրականացրած հանցագործությունները»,-ասել է Կոբախիձեն։
Լրագրողները նաեւ վարչապետից հետաքրքրվեցին, թե «Վրացական երազանք» կուսակցությունը ինչ իրավական մեթոդներ է մտադիր կիրառել «Ազգային շարժման» դեմ։
«Իրավական ձեւը կարող է տարբեր լինել, կարող է լինել բողոք դատախազություն, կարող է լինել ԱԺ քննիչ հանձնաժողով, կարող է լինել դիմում Սահմանադրական դատարան, կարելի է օգտագործել բոլոր գործիքները։ Այս ամենի մասին հանրությանը կտեղեկացվի, բայց գլխավորն այն է, որ Սաակաշվիլիի «Ազգային շարժման» ռեժիմի կողմից 2008-ին իրականացրած հացագործություններն ամբողջությամբ բացահայտվեն»,-բացատրել է Վրաստանի վարչապետը։
Հիշեցնենք, որ նախօրեին՝ օգոստոսի 7-ին «Վրացական երազանքը» հայտարարություն էր տարածել, որտեղ կրկին 2008 թվականի պատերազմի սանձազերծման համար մեղադրել էր նախկին նախագահ Միխաիլ Սաաակաշվիլիի կառավարությանը եը ընդգծել, որ իրադարձություններին «պետք է պատշաճ իրավական գնահատական տրվի՝ երկրի անշրջելի զարգացումը եւ Վրաստանում խաղաղություն երկարաժամկետ հաստատումը ապահովելու համար»։
2008 թվականի օգոստոսյան հինգ օր տեւած պատերազմի ժամանակ զոհվել են 169 զինվորական, 228 խաղաղ բնակիչ եւ14 ոստիկան։ Ընդհանուր առմամբ վիրավորների թիվը հասել է 1747 մարդու։
Վրաստանը եւ երկրի միջազգային գործընկերները Աբխազիան եւ Հարավային Օսիան համարում են Ռուսաստանի Դաշնության կողմից օկուպացված տարածքներ։ Նրանց անկախությունը ճանաչում են միայն Ռուսաստանը, Նիկարագուան, Վենեսուելան, Սիրիան եւ Նաուրուն։