ՌԴ նախագահ Վլադիմիր Պուտինը նոր հրամանագրով պարզեցրել է Վրաստանի քաղաքացիների մուտքի եւ ելքի կարգը։
Փաստաթղթի համաձայն՝ Ռուսաստանի Դաշնությունառանց վիզայի մուտքի ռեժիմն այժմ կիրառվում է Վրաստանի այն քաղաքացիների համար, որոնք ժամանում են «Ռուսաստանի Դաշնություն աշխատանքային գործունեություն իրականացնելու նպատակով կամ ավելի քան 90 օր ժամկետով Ռուսաստանի Դաշնությունում ժամանակավոր գտնվելու համար, այդ թվում՝ կրթություն ստանալու նպատակով»։
Նախկինում Վրաստանի քաղաքացիների այս կատեգորիաներն իրավունք չունեին մուտք գործելու Ռուսաստան կամ դուրս գալու Ռուսաստանի Դաշնությունից՝ առանց վիզա ստանալու։
Պուտինը 2023 թվականի մայիսի 15-ից չեղարկել է Վրաստանի քաղաքացիների համար դեռ 2000 թվականին «ահաբեկչության դեմ պայքարի նկատառումներով» ներդրված վիզային ռեժիմը։ Միաժամանակ վերսկսվել են ուղիղ չվերթերը Ռուսաստանի եւ Վրաստանի միջև։ Վրաստան առանց վիզայի մուտքի իրավունք ունեն նաև Ռուսաստանի քաղաքացիները։ Այնուամենայնիվ, երկրների միջև դիվանագիտական հարաբերություններ դեռևս չկան։