Իսրայելը շարունակական բանակցություններ է վարում Վաշինգտոնի հետ՝ Իսրայելի, Ադրբեջանի եւ ԱՄՆ-ի եռակողմ համագործակցության ամուր հիմք ստեղծելու նպատակով։ Այդ մասին Իսրայելի վարչապետի գրասենյակի անունից հայտարարել է Ազգային առաքելությունների նախարար Օրիտ Ստրոկը։
The Jerusalem Post պարբերականի հաղորդագրության համաձայն՝ վերոնշյալ հայտարարությունը հնչել է Քնեսեթում Ադրբեջանի հետ ռազմավարական դաշինքի ամրապնդման անհրաժեշտության վերաբերյալ «Շաս» կուսակցության պատգամավոր Սիմոն Մոշիաշվիլիի նախաձեռնած քննարկումների ընթացքում։
Պատգամավոր Մոշիաշվիլին այդ քննարկումների ընթացքում բարձրաձայնել է Ադրբեջանին, այսպես կոչված, Աբրահամյան համաձայնագրերի շրջանակում ընդգրկելու հնարավորության ուսումնասիրության եւ ԱՄՆ պատժամիջոցների վերացման անհրաժեշտության հարցը։
«Աբսուրդ է, որ այն պետությունները, որոնք մինչ Աբրահամյան համաձայնագրերի ստորագրումը համակարտության մեջ էին Իսրայելի հետ, համաձայանգրի ստորագրումից հետո անմիջապես ստանում են տարբեր տնտեսական եւ անվտանգության խթաններ, մինչդեռ Ադրբեջանը, որը երկար ժամանակ եղել է մեր տարածաշրջանային անվտանգության ճարտարապետության կարեւոր բաղադրիչը, ենթարկվում է ամերիկյան պատժամիջոցների»,- հայտարարել է Մոշիաշվիլիին։
Պատգամավորի այս հայտարարություններին ի պատասխան նախարար Օրիտ Ստրոկը հայտարարել է, որ Ադրբեջանը Հարավային Կովկասում Իսրայելի կարեւոր ռազմավարական դաշնակիցն է, եւ այդ հարաբերությունները ներառում են համագործակցություն անվտանգության, առեւտրի, տեխնոլոգիաների եւ էներգետիկայի ոլորտները։
Ստրոկի խոսքով՝ «Իսրայելը շարունակելու է ամրապնդել համագործակցությունը Ադրբեջանի եւ ԱՄՆ-ի հետ եւ վճռականորեն կդիմակայի այն թուլացնելու ցանկացած փորձի»։