ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Ռուսաստանի ունեցվածքի եւ ակտիվների նկատմամբ Արեւմուտքի կողմից ոտնձգությունների փորձերը անպատասխան չեն մնա։ Նա ընդգծել է, որ նման գործողությունները կդիտարկվեն որպես կողոպուտ: Ըստ Զախարովայի՝ ռուսական ակտիվների բռնագրավման իրավաչափության մասին Արեւմուտքի ոչ մի փաստարկ քննադատության չի դիմանում: «Եթե խոսում ենք տասնամյակներ շարունակ գործող իրավունքի եւ օրինականության մասին, ուրիշներից որեւէ բան խլելու եւ յուրացնելու օրինական միջոց չկա»,- ասել է ռուս դիվանագետը:
Արեւմտյան երկրները վերջին ամիսներին քննարկում են սառեցված ռուսական արժութային պահուստներն Ուկրաինային փոխանցելու հարցը։ Ըստ Bloomberg-ի՝ ԵՄ-ն ՌԴ Կենտրոնական բանկի ակտիվներից կարող է ժամանակավորապես ներգրավել առնվազն 33,8 միլիարդ եվրո, թեեւ դրա համար, ըստ ռուսական կողմի, օրինական հիմքեր չկան:
Դեռ 2022-ի նոյեմբերին Եվրամիությունը 68 միլիարդ եվրոյի ռուսական ակտիվներ էր սառեցրել։ 50 միլիարդը սառեցվել է Բելգիայում, 5,5 միլիարդը` Լյուքսեմբուրգում։ Ընդ որում՝ ակտիվների մեծ մասը Բելգիայում է։ Սակայն Եվրամիությունում հայտնի չէ՝ սառեցված ակտիվների ցուցանիշում որքան է ՌԴ ազգային պահուստների մասնաբաժինը: Փաստաթղթում դրանք գնահատվում են մոտ 33,8 միլիարդ եվրո։ Արժույթի միջազգային հիմնադրամի (ԱՄՀ) տնօրեն-կարգադրիչի տեղակալ Գիտա Գոփինաթը անցյալ տարվա մայիսին հայտարարել էր, որ ԱՄՀ-ն պատրաստ չէ բռնագրավելու ՌԴ ոսկու եւ արտարժույթի պահուստները հօգուտ Ուկրաինայի: Բրիտանական Financial Times-ն էլ նշել էր, որ ՌԴ ոսկու եւ արտարժույթի սառեցված պահուստների բռնագրավումն արտերկրում կհանգեցնի քաղաքական տնտեսության միջազգային համակարգի փլուզման: