Ըստ Медиазона-ի տվյալների` անցյալ տարվա սեպտեմբեր-հոկտեմբերին Ռուսաստանում մոբիլիզացվել է ոչ թե 300 հազար մարդ, ինչպես պաշտոնապես հայտարարվել էր նախապես, այլ 527 հազար 703 մարդ։
Медиазона-ն այս եզրահանգմանը եկել է անցյալ տարվա հոկտեմբերին մշակած մոբիլիզացիայի ծավալների գնահատման նոր մեթոդով անցկացված հետազոտության արդյունքում։
Նոր մեթոդի հիմքում, ըստ պարբերականի, արագացված կարգով կնքված ամուսնությունների վիճակագրության վերլուծությունն է։ Ըստ այդմ` 2022 թվականի սեպտեմբերի 21-ին հայտարարված «մասնակի մոբիլիզացիայից» հետո այն տղամարդկանց, որոնք ստացել էին հավաքագրման ծանուցագրեր, թույլատրվել էր արագացված կերպով ամուսնություն կնքել՝ ԶԱԳՍ-ում հայտի ներկայացման օրը։
Մոբիլիզացվածները զանգվածաբար օգտվել են այդ հնարավորությունից, որպեսզի զոհվելու պարագայում հարազատներն ու ընտանիքի անդամները փոխհատուցում ստանալու իրավունք ունենային։ Ուշագրավ է այն, որ նույնիսկ այն բանից հետո, երբ իշխանությունները պաշտոնապես հայտարարեցին, որ մասնակի զորահավաքն ավարտված է, արագացված ամուսնությունների կնքման ծավալուն հոսքը չի դադարել, եւ հավաքագրվածները շարունակել են ամուսնանալ արդեն ծառայության վայրում կամ արձակուրդ գալուց հետո։
Պաշտոնական վիճակագրությունը նույնիսկ վկայում է, որ 2022 թվականի նոյեմբերին, 2021 թվականի նույն ժամանակահատվածի համեմատությամբ, կնքված ամուսնությունների թիվը 45 հազարով ավելին է եղել, դեկտեմբերին՝ 16 հազարով։ Հետազոտության վերջնարդյունքում Медиазона-ի մասնագետները պարզել են, որ մոբիլիզացվածների թիվը եղել է ոչ թե 300 հազար, այլ ոչ պակաս, քան 527 հազար։