ԱՄՆ Պետդեպարտամենտի ներկայացուցիչ Նեդ Փրայսը հայտնել է, որ Հարավային Կովկասում բանակցությունների գծով ԱՄՆ պետքարտուղարի ավագ խորհրդական, ԵԱՀԿ Մինսկի խմբի ամերիկացի համանախագահ Լուիս Բոնոն այս պաշտոնում առաջին անգամ կայցելի տարածաշրջան։ Ուղեւորությունը տեղի կունենա հաջորդ շաբաթ:
Փրայսը նշել է՝ Վաշինգտոնը հույս ունի, որ ավագ խորհրդականի այցերը Հարավային Կովկասի երկրներ պարբերական կլինեն: «Բոնոն մտադիր է հանդիպել երկրների ղեկավարների հետ՝ հայ-ադրբեջանական խաղաղ գործընթացին աջակցելու եւ մեր անփոփոխ հավատարմությունը Վրաստանի ինքնիշխանությանն ու տարածքային ամբողջականությանը արտահայտելու համար։ Ինչպես ավելի վաղ նշեցի, իր այցի շրջանակում նա կայցելի Հարավային Կովկասի բոլոր երեք երկրները։ Նա ըստ հերթականության կմեկնի Բաքու, Երեւան եւ Թբիլիսի»,- նշել է ամերիկացի դիվանագետը։
Վաշինգտոնի համոզմամբ տարածաշրջան կատարած այցը Բոնոյին կօգնի շարունակելու Մյունխենի անվտանգության համաժողովի շրջանակում ԱՄՆ պետքարտուղարի, Հայաստանի եւ Ադրբեջանի ղեկավարների միջեւ տեղի ունեցած երկխոսությունը: «Ինչպես արդեն հայտարարել ենք եռակողմ բանակցությունների ավարտին, ոգեւորված ենք Հայաստանի եւ Ադրբեջանի վերջին ջանքերից՝ խաղաղ գործընթացին արդյունավետ մասնակցելու ուղղությամբ»,- նշել է Փրայսը:
Պետդեպարտամենտի խոսնակը հավելել է, որ առաջիկա հանդիպումների ընթացքում Բոնոն կընդգծի, որ Միացյալ Նահանգները հավատարիմ է Հարավային Կովկասում խաղաղ, ժողովրդավարական եւ բարգավաճ ապագայի կառուցմանը:
ԱՄՆ համանախագահի պաշտոնը թափուր չի մնում
Կովկասում բանակցությունների գծով ավագ խորհրդականի եւ ԵԱՀԿ ՄԽ համանախագահի պաշտոնը նախկինում զբաղեցրել է Ֆիլիպ Ռիքերը, որը նախորդ տարվա օգոստոսի վերջին այդ պաշտոնում փոխարինել էր Էնդրյու Շաֆերին: Նրա հրաժարականի մասին ԱՄՆ Պետդեպարտամենտը հայտնել էր հունվարի սկզբին։ Փետրվարի 1-ին հայտնի դարձավ, որ ԱՄՆ պետքարտուղար Էնթոնի Բլինքենն այդ պաշտոնում նշանակել է Լուիս Բոնոյին: Նախկինում Բոնոն զբաղեցնում էր ՄԱԳԱՏԷ-ում Միացյալ Նահանգների ներկայացուցչի պաշտոնակատարի պաշտոնը: Լուիս Բոնոն եղել է նաեւ ԱՄՆ պետքարտուղարի առաջին տեղակալի եւ պետքարտուղարի տնտեսական հարցերով տեղակալի խորհրդականը: