Ֆրանսիացի ռեժիսոր Բեռնար-Անրի Լեւին ներկայացրել է ռուս-ուկրաինական պատերազմին նվիրված «Փառք Ուկրաինային» վերնագրով կինոնկարը։ Սա ռեժիսոր Լեւիի արդեն երկրորդ կինոնկարն է, որ նվիրված է ռուս-ուկրաինական պատերազմին։ Կինոնկարի պրեմիերան տեղի է ունեցել փետրվարի 26-ին։ Այն վավերագրական ժապավեն է, որ ստեղծվել է Ուկրաինայի թեժ կետեր ռեժիսորի կատարած ուղեւորությունների մոտիվներով։ Կինոնկարը կարելի է համարել յուրատեսակ տեսավավերագրություն։
«Փառք Ուկրաինային» ժապավենը «Ինչու Ուկրաինան» կինոնկարի շարունակությունն է։ Առաջին մասում Լեւին եւ նրա օգնականները պատմել են Ուկրաինա ռուս օկուպանտների լայնածավալ ներխուժման սկզբնական փուլի եւ ուկրաինացի ժողովրդի ցուցաբերած հերոսական դիմադրության մասին։ Այժմյան ֆիլմը Խարկովի եւ Խերսոնի մարզերում ուկրաինական զորքերի հակագրոհների մասին է պատմում։ Կինոնկարի երաժշտությունը գրել է «Օկեան Էլզի» խմբի ղեկավար Սվյատոսլավ Վակարչուկը։ Կիեւում տեղի ունեցած պրեմիերային ներկա են եղել նաեւ Ուկրաինայի պաշտպանության, մշակույթի եւ արտաքին գործերի նախարարները։
«Փառք Ուկրաինային» կինոնկարը արդեն ցուցադրվում է ֆրանսիական կինոթատրոններում։ Կա մտադրություն ժամանակի հետ այն ցուցադրել Եվրոպայի բոլոր երկրներում, այդ թվում նաեւ հենց Ուկրաինայում։ Կինոնկարից ստացված հասույթը Լեւին մտադիր է փոխանցել Ուկրաինայի առաջին տիկին Ելենա Զելենսկայայի հիմնադրամին։
Բեռնար-Անրի Լեւին ֆրանսիացի փիլիսոփա է, գրող եւ լրագրող։ Նա նաեւ Ուկրաինայի արդիականացման գործակալության համահիմնադիրն է եղել։ Ուկրաինայի կյանքին ակտիվ մասնակցություն է ունեցել դեռ 2014 թվականից։