ԱՄՆ Սենատի արտաքին հարաբերությունների հանձնաժողովի նախագահ Ռոբերտ Մենենդեսի հանձնարարությամբ Հայաստան է այցելել հանձնաժողովի աշխատակազմի ներկայացուցիչներ Սառա Արքինի եւ Դեմյան Մերֆիի ղեկավարած պատվիրակությունը: Օգոստոսի 8-ին պատվիրակությունը Սյունիքի մարզպետ Ռոբերտ Ղուկասյանի ուղեկցությամբ այցելել է Տեղ համայնքի Կոռնիձոր գյուղ։ Այստեղ ամերիկացի պատվիրակներին են ներկայացվել Հակարիի կամրջի փակ լինելու փաստն ու երկկողմ երթեւեկության բացակայությունը։
Նրանք նաեւ իրենց աչքերով են տեսել, որ ՀՀ Կառավարության ուղարկած հումանիտար բեռով մեքենաները մինչ օրս կանգնած են սահմանից այս կողմ եւ չեն կարողանում կենսական անհրաժեշտության բեռը հասցնել Արցախի բնակիչներին։
Օգոստոսի 7-ին Սենատի ներկայացուցիչները հանդիպել են Սյունիքի մարզպետի եւ Գորիս համայնքի ղեկավար Առուշ Առուշանյանի հետ։ Վերջիններս ներկայացրել են Սյունիքի սահմաններին տիրող իրավիճակը, ՀՀ ինքնիշխան տարածքի հանդեպ Ադրբեջանի ոտնձգություններն ու Արցախի շրջափակման եւ դրա հետեւանքով առաջացած հումանիտար աղետը։