Թուրքիան Ֆրանսիային զգուշացրել է, որ Ադրբեջանը միայնակ չէ։ Այս մասին Բաքվում լրագրողների հետ զրույցի ժամանակ ասել է ՆԱՏՕ-ի Խորհրդարանական վեհաժողովում Թուրքիայի Ազգային մեծ ժողովի պատվիրակության ղեկավար, նախկին արտգործնախարար Մեւլութ Չավուշօղլուն։
«Այդ մասին մենք բազմիցս հայտարարել ենք Ֆրանսիայի ներկայացուցիչներին։ Նրանք պետք է դադարեցնեն Հայաստանին այլ կերպ աջակցելու փորձերը։ Թող չմոռանան, որ մեր սիրելի Ադրբեջանը երբեք մենակ չի մնում»,-ասել Չավուշողլուն։
Նրա խոսքերով 2021 թվականի Շուշիի Ադրբեջանի եւ Թուրքիայի միջեւ դաշնակցային հարաբերությունների մասին հռչակագրով Անկարան բազմակողմանի աջակցություն կցուցաբերի Բաքվին։
«Հայաստանին ռազմական աջակցություն ցուցաբերելը ոչ մի օգուտ չի խոստանում ո՛չ Հայաստանին, ո՛չ էլ տարածաշրջանին»,-նշել է Չավուշողլուն։
Թուրք դիվանագետը նաեւ անդրադարձել է այսպես կոչված «Զանգեզուրի միջանցքի» թեմային՝ նշելով, որ դրա բացումը օգտակար կլինի բոլոր կողմերի համար։
«Այս միջանցքի բացումը լավ օգուտներ է խոստանում ինչպես տարածաշրջանի, այնպես էլ հենց Հայաստանի համար։ Այս առումով մենք աջակցում ենք Զանգեզուրի միջանցքի բացմանը»,-նշել է Չավուշողլուն։