Բրյուսելը քննադատում է «Վրացական երազանք» կուսակցության «օտարերկրյա ազդեցության թափանցիկության մասին» օրինագիծը կրկին խորհրդարանում քննարկման ներկայացնելը։ Այս մասին հայտարարել է ԵՄ արտաքին գործերի եւ անվտանգության հարցերով բարձր հանձնակատար Ժոզեպ Բորելի խոսնակ Պիտեր Ստանոն։
«Վրաստանի իշխող կուսակցության հայտարարությունը «Օտարերկրյա ազդեցության թափանցիկության մասին» օրինագիծը վերականգնելու մասին լուրջ մտահոգություններ է առաջացնում։ Եվրամիությունը հիշեցնում է Վրաստանի կառավարության եւ իշխող կուսակցության՝ նախորդ տարի հնչեցրած հրապարակային խոստումը՝ նման օրինագիծը «անվերապահորեն հետ կանչելու» մասին։ ԵՄ-ն ցավում է, որ այս հարցը վերաբացվում է՝ չնայած 2023 թվականի մարտին տեղ գտած հասարակական եւ միջազգային ուժեղ արձագանքին»,-ասել է Ստանոն։
Նա ընդգծել է, որ քաղաքացիական հասարակության կազմակերպությունների համար բարենպաստ միջավայրի ստեղծումն ու պահպանումը, ինչպես նաեւ ԶԼՄ-ների ազատության ապահովումը ժողովրդավարության հիմքում են, որոնք վճռորոշ են նաեւ Վրաստանի ԵՄ անդամակցության գործընթացի համար։
Ստանոն նաեւ հիշեցրել է բոլոր այն պարտականությունները, որոնք Վրաստանը պետք է կատարի ԵՄ անդամակցության թեկնածու երկրի կարգավիճակ ստանալուց հետո։
«Քայլ № 9-ը Վրաստանում առաջարկում է ապահովել քաղաքացիական հասարակության ազատ գործունեությունը, իսկ Քայլ № 1-ը Վրաստանին կոչ է անում պայքարել ԵՄ-ի եւ նրա արժեքների վերաբերյալ ապատեղեկատվության դեմ: Թափանցիկությունը չպետք է օգտագործվի որպես քաղաքացիական հասարակության ազատ գործելու կարողությունը սահմանափակելու գործիք: Մենք կոչ ենք անում Վրաստանի քաղաքական առաջնորդներին ընդունել եւ իրականացնել բարեփոխումներ, որոնք համահունչ են Եվրամիությանն անդամակցելու հայտարարված նպատակին, որին աջակցում է Վրաստանի քաղաքացիների ճնշող մեծամասնությունը»,-ասել Ստանոն։