Հելսինկիում ապամոնտաժել են Ֆինլանդիային նվիրված ԽՍՀՄ-ի «Խաղաղություն ամբողջ աշխարհում» հուշարձանը։
Հուշարձանը տեղափոխել են նավով եւ մտադիր են փոխանցել Ֆինլանդիայի մայրաքաղաքի գեղարվեստական թանգարանին, որն էլ կորոշի դրա հետագա ճակատագիրը։
Տարբեր մայրցամաքներում մարդկանց վեր պահած ձեռքերում ճյուղերով երկրագունդ պատկերված քանդակը Հելսինկիին էր նվիրել Մոսկվան 1990-ին՝ Բեռլինի պատի փլուզումից երկու ամիս անց։ Ֆինլանդիան ի պատասխան Ռուսաստանին էր նվիրել «Աշխարհի երեխաները» հուշարձանը, որը տեղադրվել է Մոսկվայում՝ Լենինգրադի մայրուղու Բարեկամության այգում:
Օրերս հայտնի դարձավ նաեւ, որ Էստոնիայի կառավարությունը որոշել է երկրի տարածքում հնարավորինս արագ ապամոնտաժել խորհրդային ժամանակների բոլոր հուշարձանները: