Մեղրի համայնքի ղեկավար Բագրատ Զաքարյանը հայտնել է, որ Մեղրի խոշորացված համայնքում ռուս սահմանապահները 5 մոդուլային հենակետ են տեղադրել, եւ ռուսական սահմանապահ զորքերը սահմանային ծառայություն են անցկացնում:
Օգոստոսի 8-ին լուրեր էին շրջանառվում, թե Մեղրի-Ագարակ ճանապարհին անցակետ է տեղադրվել։ Ըստ լուրերի` ռուսները ստուգում են բոլոր ավտոմեքենաները։
Զաքարյանը պատմել է, որ արդեն 8-9 ամիս է, ինչ մոդուլային 5 հենակետեր կան Մեղրիում` Մեղրի-Ագարակ ճանապարհին, եւ ընդհանրապես Արաքսի ափով մեկ։ Ըստ նրա՝ արդեն 77 տարի է, ինչ ռուս սահմանապահ զորքերն այստեղ իրենց համապատասխան ստորաբաժանումներն ունեն եւ ծառայություն են անցկացնում։
«Սակայն վերջին ամիսներին մոդուլային հենակետեր են տեղադրել, եւ սահմանապահները հավելյալ ծառայություն են մատուցում, որն ամրագրված է «Պետական սահմանի մասին» օրենքով»,– նշել է Մեղրի համայնքի ղեկավարը։
Ըստ Զաքարյանի` ռուս սահմանապահները ժամանակ առ ժամանակ մեքենաները կանգնեցնում եւ ստուգումներ են անցկացնում։ Զաքարյանի պնդմամբ՝ դա արվում է անվտանգության նկատառումներով։
Հայաստանում Ռուսաստանի Անվտանգության դաշնային ծառայության սահմանապահ վարչության Մեղրու սահմանապահ ջոկատը ստեղծվել է 1955 թվականին։