Հայաստանում ՌԴ ԱԴԾ սահմանապահ վարչությունը հաստատել է, որ ուժեղացվել է հսկողությունը պետական սահմանի հայ-իրանական հատվածում։ Դա պայմանավորված է վերջին շրջանում Իրանից Հայաստան թմրամիջոցների եւ հոգեմետ նյութերի (հաշիշ, մետամֆետամին, հերոին) ապօրինի ներկրման փորձերի աճով։
Ավելի վաղ լրացուցիչ 5 մոդուլային կետերի տեղադրման մասին «Սպուտնիկ Արմենիային» հայտնել էր Մեղրի համայնքի ղեկավար Բագրատ Զաքարյանը՝ նշելով, որ դրանք տեղադրվել են մոտ 8-9 ամիս առաջ։
ՌԴ ԱԴԾ սահմանապահ վարչությունը արձանագրել է ծայրահեղական եւ ահաբեկչական կազմակերպությունների ներկայացուցիչների՝ պետական սահմանը խախտելու դեպքեր։ Այսպես՝ 2021-ին Մեղրիի սահմանային հատվածում ռուս սահմանապահները զենքով, նռնակներով եւ մեծ քանակությամբ զինամթերքով երկու զինյալների են ձերբակալել, որոնք ապօրինի մուտք էին գործել Իրանից։
ՀՀ-ում ՌԴ ԱԴԾ սահմանապահ վարչությունը Հայաստանի անվտանգությունն ապահովելու նպատակով եւ «Պետական սահմանի մասին» օրենքին համապատասխան, Կառավարության, Ազգային անվտանգության ծառայության եւ այլ իրավասու մարմինների հետ համաձայնեցնելով, այս տարվա սկզբում կահավորված դիրքեր են տեղադրել։
Դա արվել է անձանց եւ տրանսպորտային միջոցների նկատմամբ ընտրանքային (իսկ սահմանախախտների որոնման եւ հետապնդման դեպքում առանց բացառության) ստուգման միջոցառումներ իրականացնելու, մաքսանենգության, անօրինական միգրացիայի եւ այլ իրավախախտումների փաստերի հայտնաբերման, զգուշացման եւ կանխարգելման նպատակով:
Սահմանապահները խնդրում են սահմանային գոտում տեղաշարժ իրականացնող քաղաքացիներին ըմբռնումով մոտենալ իրավապահ մարմինների օրինական պահանջներին։
Միջպետական պայմանագրի շրջանակում Ռուսաստանի Անվտանգության դաշնային ծառայության սահմանապահ վարչությունը Հայաստանում զբաղվում է Թուրքիայի եւ Իրանի հետ Հայաստանի պետական սահմանի պահպանությամբ: