ԵՄ-ի արտաքին քաղաքականության եւ անվտանգության հարցերով բարձր հանձնակատար Ժոզեպ Բորելը հայտնել է, որ Եվրամիությունը շատ կոշտ պատժամիջոցներ կսահմանի Իրանի դեմ բողոքի ցույցերին առնչվող իրավիճակի եւ Ռուսաստանին ռազմական մատակարարումների պատճառով:
Ըստ իրանական Mehr գործակալության՝ Թեհրանն արձագանքել է Ժոզեպ Բորելի ազդարարած սահմանափակումներին՝ դրանք անվանելով ոչ կառուցողական: «Չենք ընդունում որեւէ միջամտություն երկրի ներքին գործերին եւ համարում ենք, որ նման գործողությունները ոչ կառուցողական են եւ հակասում են ՄԱԿ-ի կանոնադրությանը եւ միջազգային կանոնակարգերին ու մեխանիզմներին»,- նշել է Իրանի ԱԳՆ պաշտոնական ներկայացուցիչ Նասեր Քանաանին։ Նա հավելել է, որ Իրանի Իսլամական Հանրապետությունն իրավունք ունի արձագանքելու եւ պատասխան միջոցներ կիրառելու:
«Այս առնչությամբ Իրանը կօգտվի դիվանագիտական դաշտում իր օրինական իրավունքներից: Այսօր կհրապարակենք Եվրամիության եւ Մեծ Բրիտանիայի մի շարք հաստատությունների եւ անհատների նկատմամբ նոր պատժամիջոցների ցանկը»,- շեշտել է Քանաանին:
Անդրադառնալով Ուկրաինայում ռազմական գործողությունների համար ՌԴ-ին անօդաչուներ մատակարարելու մասին մեղադրանքներին՝ Իրանի ԱԳՆ խոսնակը նշել է, որ Թեհրանը որեւէ ռազմական օգնություն չի տրամադրում հակամարտության կողմերից որեւէ մեկին, իսկ Իրանի եւ Ռուսաստանի միջեւ պաշտպանական ոլորտի համագործակցությունն ուղղված չէ որեւէ երրորդ երկրի դեմ: