ՊԵԿ մամուլի ծառայությունը հայտնել է, որ կոմիտեի մաքսանենգության դեմ պայքարի վարչության աշխատակիցները բացահայտել են թմրանյութի տեղափոխման բացառիկ դեպք: Սա վերջին 7 տարում Հայաստանով թմրանյութի տեղափոխման խոշորագույն դեպքն է, որն աննախադեպ է ամբողջ տարածաշրջանում:
Երեւանի մաքսային պահեստներից մեկում մաքսային հսկողությունը հայտնաբերել է հերոինի առանձնապես խոշոր խմբաքանակ` 33 արկղ: Մոտ 45 միլիոն ԱՄՆ դոլար շուկայական արժեքով, փաթեթավորման հետ շուրջ 365 կիլոգրամ կշռող հերոինը հայտնաբերվել է որպես խմորիչ հայտարարագրված 18600 կիլոգրամ բեռի կազմում:
Ըստ ՊԵԿ-ի՝ խմորիչի փաթեթավորմամբ հերոինն Իրանի Իսլամական Հանրապետությունից Հայաստանի տարածքով նախատեսված էր տեղափոխել Արեւմտյան Եվրոպա:
Դեպքի բացահայտման աշխատանքներում ներգրավվել են նաեւ ՊԵԿ շնագիտական կենտրոնի կինոլոգներն ու ծառայողական շները: Օպերատիվ-հետախուզական միջոցառումների անցկացման փուլում ակտիվ մասնակցություն են ունեցել ՀՀ ոստիկանության եւ ԱԱԾ աշխատակիցները:
Դեպքի առթիվ ՊԵԿ քննչական վարչությունում հարուցվել է քրեական գործ, ձերբակալվել է տարբեր քաղաքացիություններ ունեցող 6 անձ։
Գործի հետ առնչություն ունեցող հնարավոր այլ անձանց շրջանակը պարզելու նպատակով ԱԱԾ–ի հետ լայնածավալ օպերատիվ-հետախուզական միջոցառումներ են անցկացվում: