Իրանի արտաքին քաղաքական գերատեսչության պաշտոնական ներկայացուցիչ Սայիդ Խաթիբզադեն հայտարարել է, որ Վիեննայում միջուկային գործարքի շուրջ բանակցությունների դադարեցման պատճառը Սպիտակ տան՝ ներքաղաքական խնդիրների լուծման համար իրադրությունն օգտագործելու փորձն է:
Դիվանագետը հավելել է, որ եթե ԱՄՆ-ը պատրաստ է համաձայնագրի ստորագրմանը, ապա պետք է քաղաքական որոշում ընդունի:
Վիեննայում սկզբնական տեսքով իրանական միջուկային ծրագրի շուրջ Գործողությունների համատեղ համապարփակ ծրագրի (ԳՀՀԾ) վերականգնման եւ այդ ԱՄՆ-ի՝ բազմակողմ համաձայնագրին վերադարձի շուրջ բանակցությունների ութերորդ փուլից հետո՝ մարտի 11-ին, արտաքին գործոնների պատճառով ընդմիջում էր վերցրել։
Մինչ այդ Վիեննայի բանակցությունները հասել էին վերջնագծին, համաձայնագրի 20-էջանոց տեքստը համաձայնեցվել էր, եւ մինչեւ փետրվարի վերջը բանակցությունները պետք է ավարտվեին:
Միացյալ Թագավորության ԱԳՆ-ի տարածած հայտարարության մեջ Մեծ Բրիտանիան, Ֆրանսիան եւ Գերմանիան ափսոսանք են հայտնել Իրանի միջուկային ծրագրի վերաբերյալ ԳՀՀԾ-ի վերականգնմանը նվիրված՝ Վիեննայի բանակցություններում հայտարարված դադարի կապակցությամբ:
Ընդ որում եվրոպացի բանակցողները հավելել են, որ ոչ ոք չպետք է փորձի ԳՀՀԾ-ի բանակցություններն օգտագործել գործարքին չվերաբերող երաշխիքներ ստանալու համար։