ՄԱԿ-ի գլխավոր քարտուղար Անտոնիո Գուտերեշը հայտարարել է, որ տասնամյակներ անց միջուկային առճակատման վտանգը կրկին ի հայտ է եկել։ Նա միջուկային տերություններին կոչ է արել պարտավորվելու առաջինը չօգտագործել նման զենք:
Արձագանքելով Ուկրաինայում Եվրոպայի ամենամեծ՝ Զապորոժիե ատոմակայանի ուղղությամբ նոր գնդակոծությունների մասին լուրերին՝ Գուտերեշն ասել է, որ ատոմակայանի վրա ցանկացած հարձակում ինքնասպանություն է։ Նա հույս է հայտնել, որ դրանք կդադարեն։
«Միաժամանակ ուզում ենք, որ ՄԱԳԱՏԷ-ն հասանելիություն ստանա կայանին։ Հույս ունենք, որ ՄԱԳԱՏԷ-ն կկարողանա օգտագործել իր իրավասությունները»,- հավելել է Գուտերեշը։
ՌԴ ՊՆ-ն ավելի վաղ հայտարարել է, թե ՄԱԿ-ի աշխատակիցները խոչընդոտներ են ստեղծում ՄԱԳԱՏԷ-ի ղեկավարության համար, որպեսզի չկարողանան Զապորոժիեի ԱԷԿ-ի վիճակի օբյեկտիվ միջազգային վերահսկումը հաստատել։
Ավելի վաղ հայտնի էր դարձել, որ շաբաթ, լույս կիրակի գիշերը ուկրաինական ԶՈՒ-ն հարվածներ է հասցրել Զապորոժիեի ԱԷԿ-ին, բեկորներն ու հրթիռային շարժիչն ընկել են կայանի գործող էներգաբլոկից մոտ 400 մետր հեռավորության վրա։
Քաղաքի վարչակազմից հայտնել են, որ էներգաբլոկի վնասման դեպքում հրթիռակոծությունը սպառնում է Ուկրաինայի, Եվրոպայի, ինչպես նաեւ Ասիայի հարյուրհազարավոր բնակիչների կյանքին։
Զապորոժիեի ԱԷԿ-ը մարտից վերահսկում են ՌԴ զինվորականները։