ԱՄՆ նախագահ Ջո Բայդենը եւ ՄԱԿ-ի գլխավոր քարտուղար Անտոնիու Գուտերեշը ողջունել են Իսրայելի եւ պաղեստինյան «Իսլամական ջիհադի»՝ նախօրեին հայտարարված զինադադարը։
Իսրայելը եւ պաղեստինյան կողմը Եգիպտոսի միջնորդությամբ պայմանավորվել են օգոստոսի 7-ի երեկոյից Գազայում զինադադար հաստատել։ Հրադադարն ուժի մեջ է մտել օգոստոսի 7-ի 23:30-ին (Երեւանի ժամանակով օգոստոսի 8-ի 00:30-ին)։
«Իմ վարչակազմն աջակցում է զոհերի մասին մանրակրկիտ հետաքննությանը եւ կողմերին կոչ անում լիովին հետեւելու հրադադարին, ինչպես նաեւ ապահովելու Գազա վառելիքի եւ հումանիտար բեռների մատակարարումը մինչեւ ռազմական գործողությունների ավարտը»,- ասված է ԱՄՆ նախագահի հայտարարության մեջ:
ՄԱԿ-ի ղեկավարի պաշտոնական ներկայացուցիչ Ստեֆան Դյուժարիկը հայտնել է, որ գլխավոր քարտուղարը ողջունել է Գազայում եւ Իսրայելում հրադադարի հայտարարումը եւ բոլոր կողմերին կոչ արել պահպանելու հրադադարի ռեժիմը։ Գուտերեշը բարձր է գնահատել Եգիպտոսի՝ խաղաղության վերականգնման նպատակով ՄԱԿ-ի հետ համակարգված ջանքերը:
Խախտելով ավելի քան մեկ տարի շարունակված հարաբերական կայունությունը՝ օգոստոսի 4-ից վերսկսվել էին հրետակոծությունները Իսրայելի եւ պաղեստինյան Գազայի հատվածի միջեւ։ Իսրայելական օդուժը ռմբակոծել էր Գազայի հատվածը, իսկ պաղեստինյան կողմից ինքնաշեն հրթիռներ էին արձակվել իսրայելական բնակավայրերի ուղղությամբ։
Ուրբաթ Իսրայելը հայտարարեց, որ հատուկ գործողություն է ձեռնարկում «Իսլամական ջիհադ» խմբավորման դեմ, որի բարձրաստիճան հրամանատարներից մեկը սպանվեց անսպասելի ավիահարվածով։ Իսրայելի վարչապետ Յաիր Լապիդը հայտարարել է, թե այդ օրվա հարվածներով խափանվել է «Իսլմական ջիհադի» հարձակումը։