«Վեոլիա ջուր» ընկերությունը մտադիր է ջրի սակագնի վերանայման հայտով դիմել Հանրային ծառայությունները կարգավորող հանձնաժողովին։
Ընկերությունն առաջիկա օրերին հանդես կգա պաշտոնական առաջարկով` ջրի մատակարարման եւ ջրահեռացման սակագինը գործող 200 դրամի փոխարեն յուրաքանչյուր 1 խմ-ի համար սահմանել 209 դրամ։
Հայտը հիմնավորվել է այս տարվա առաջին կիսամյակի ընթացքում արձանագրված 8,3% սղաճով։
Ըստ ջրամատակարար ընկերության՝ սղաճի հետեւանքով փոփոխված գնային հաշվարկով խմելու ջրի մատակարարման սակագինը քաղաքացիների համար յուրաքանչյուր 1 խմ-ի դիմաց կլինի 177,6 դրամ, ջրահեռացման (կեղտաջրերի մաքրման) սակագինը յուրաքանչյուր 1 խմ-ի դիմաց` 31,3 դրամ։ Գումարային սակագինը կլինի 1 խմ-ը 209 դրամ։
Մեծածախ խմելու ջրի մատակարարման ծառայության մատուցման սակագինը յուրաքանչյուր 1 խմ-ի դիմաց կլինի 41,8 դրամ, ջրահեռացման սակագինը 1 խմ-ի դիմաց՝ 20,9 դրամ, գումարայինը` 62,7 դրամ։
«Կարեն Դեմիրճյանի անվան Երեւանի մետրոպոլիտեն» փակ բաժնետիրական ընկերության ստորգետնյա ջրերի հեռացման ծառայության մատուցման սակագինը վերահաշվարկված արժեքով կլինի 1 խմ-ի դիմաց 12,2 դրամ, ընթացիկ արժեքը՝ 11,267 դրամ։
Սրանք «Վեոլիա ջուր» ընկերության առաջարկած նոր սակագներն են, որոնք դեռ պետք է ուսումնասիրի ՀԾԿՀ–ն եւ իր վերջնական եզրակացությունն ասի։
Հունվարի 1-ից ջրի սակագինը թանկացել է 20,47 դրամով։ Սոցիալապես անապահով բաժանորդների համար սակագինը չի փոխվել, մնացել է 180 դրամ, մյուս բաժանորդների համար այն դարձել է 200,47 դրամ։