ԱՄՆ Պետդեպարտամենտի պաշտոնական ներկայացուցիչ Նեդ Փրայսը ճեպազրույցի ժամանակ հայտարարել է, որ Միացյալ Նահանգները կշարունակի աջակցել իր գործընկերներին տարածաշրջանում Իրանի սպառնալիքի դեմ։
Լրագրողներն ասել են, որ Իրանից հարեւան երկրների նկատմամբ աճող հռետորաբանություն կա, Թեհրանը սպառնում է Ադրբեջանին՝ մեղադրելով Իրանի տարածքում ահաբեկչություն իրականացնելու համար: «Արդյոք ԱՄՆ-ը կկարողանա՞ պաշտպանել Ադրբեջանին» հարցին ի պատասխան Փրայսը հիշեցրել է, որ ԱՄՆ պետքարտուղար Էնթոնի Բլինքենը մի քանի օր առաջ հանդիպել է Հայաստանի եւ Ադրբեջանի արտգործնախարարներ Արարատ Միրզոյանի եւ Ջեյհուն Բայրամովի հետ:
«Հստակ հայտարարել ենք՝ Իրանը սպառնալիք է տարածաշրջանի համար։ Մենք կշարունակենք կանգնել մեր գործընկերների կողքին, աջակցել նրանց եւ ի վերջո դիմակայել այն ապակայունացնող ազդեցությանը, որը ներկայացնում է Իրանն ինչպես տարածաշրջանում, այնպես էլ դրանից դուրս»,–շեշտել է Փրայսը։
«Ինչու ԱՄՆ-ը պատժամիջոցներ չի սահմանում Իրանի գերագույն հոգեւոր առաջնորդի դեմ» հարցին ի պատասխան Փրայսը հայտարարել է, որ ԱՄՆ-ը փնտրում է իրանական ռեժիմի վրա ճնշում գործադրելու անհրաժեշտ եղանակներ: Խոսնակը նշել է, որ իր «չարաբաստիկ գործողությունների»՝ միջուկային ծրագրից եւ բալիստիկ հրթիռներից մինչեւ ահաբեկչության եւ խամաճիկային ուժերի աջակցության համար Իրանն առանց դրա էլ խիստ պատժամիջոցների տակ է:
Սեպտեմբերի 13-14-ին Հայաստանի դեմ Ադրբեջանի ագրեսիայից հետո Իրանի իշխանությունները քանիցս հայտարարել էին, որ Թեհրանը չի հանդուրժի տարածաշրջանում սահմանների փոփոխություն։ Իրանի զինված ուժերը զորավարժություններ են անցկացրել Ադրբեջանի հետ սահմանին։