Նոյեմբերի 11-ին Սամարղանդում ընթացող Թյուրքական պետությունների կազմակերպության գագաթնաժողովում Թուրքիայի նախագահ Էրդողանը խոսել է այս պետությունների «միասնական պայքարի», զարգացման ու նոր «Թյուրքական աշխարհի տեսլականի» մասին, հաղորդում է Sabah պարբերականը։
Ստորեւ ներկայացնում ենք Էրդողանի ելույթի առանցքային մտքերը․
- «Չնայած Ադրբեջանի բոլոր ջանքերին՝ Հարավային Կովկասում խաղաղության գործընթացը դեռեւս շատ փխրուն է։ Ինչպես իր արդար պայքարի ընթացքում, այնպես էլ խաղաղության փնտրտուքում մենք Ադրբեջանի կողքին ենք»:
- «Եվրամիությունը արդեն 52 տարի է՝ իր դռան առջեւ մեզ քարշ է տալիս։ Բայց մենք նրանց արժանի պատասխանը ճիշտ ժամանակին կտանք»։
- «Թյուրքական աշխարհի տեսլականը 2040 թվականի համար մեր համագործակցության հիմքն է։ Մենք ցանկանում ենք, որ թյուրքական պետություններն ամրապնդեն ու ավելի զարգացնեն համագործակցությունը քաղաքականության, անվտանգության, առեւտրի, առողջապահության, գիտության, հաղորդակցության, էներգետիկայի եւ սպորտի բնագավառներում։ Իսկ այսօր մեր պատրաստած ռազմավարական փաստաթուղթը հենց այդ նպատակին տանող ճանապարհային քարտեզն է»։
- «Հյուսիսային Կիպրոսի Թուրքական Հանրապետությանը (ՀԿԹՀ) Թյուրքական պետությունների կազմակերպության կազմում շնորհել ենք դիտորդի կարգավիճակ։ Սրանով ցանկանում ենք ցույց տալ, որ Կիպրոսի մեր եղբայրները թյուրքական աշխարհի անբաժան մասն են»։
Էրդողանն անդրադարձել է բնապահպանական խնդիրներին, ինչպես նաեւ ահաբեկչության դեմ թյուրքական պետությունների համատեղ պայքարի հարցին։
Պատրաստեց Լիլիթ Գրիգորյանը