ԵՄ դիվանագիտական գերատեսչության պաշտոնական ներկայացուցիչ Պիտեր Ստանոն հայտարարություն է տարածել Լեռնային Ղարաբաղի հակամարտության գոտում 44-օրյա պատերազմի ավարտի երկրորդ տարվա կապակցությամբ: ԵՄ-ն վերհիշում է վերջին 30 տարիների ընթացքում հակամարտության բոլոր հայ եւ ադրբեջանցի զոհերին։
ԵՄ-ն ողջունում է Հայաստանի եւ Ադրբեջանի ղեկավարությունների ձեռնարկած բազմաթիվ քայլերը՝ ուղղված տարաձայնությունների հարթեցմանը:
«Այս առիթով ԵՄ-ն հիշում է վերջին 30 տարիների ընթացքում հակամարտության բոլոր հայ եւ ադրբեջանցի զոհերին։ Լիովին գիտակցելով այս դժվարին ժառանգությունը՝ ԵՄ-ն երկու կողմերին էլ կոչ է անում շրջելու թշնամանքի էջը եւ շարունակելու հաշտեցման ջանքերը՝ կանխելու մարդկային կյանքի հետագա անհարկի կորուստները եւ վնասները»,- նշված է հայտարարությունում։
Մեղմել հռետորաբանությունը եւ չսրել լարվածությունը
Դիվանագետը շեշտել է, որ թեեւ բանակցությունները բարդ են, սակայն կարեւոր է համաձայնեցնել հետագա քայլերը: Եվրոպական միությունը նաեւ ողջունում է Հայաստանի եւ Ադրբեջանի ղեկավարության ձեռնարկած բազմաթիվ քայլերը՝ իրենց տարաձայնությունները հաղթահարելու եւ տարածաշրջանում երկարատեւ եւ կայուն խաղաղության հասնելու համար։
«ԵՄ-ն բարձր է գնահատում կողմերի կայուն ներգրավվածությունը տարբեր մակարդակներում եւ տարբեր ձեւաչափերով ընթացող բանակցություններում: Թեեւ այս բանակցություններն ակնհայտորեն բարդ են եւ ժամանակ կպահանջեն, կարեւոր է չկորցնել թափը, համաձայնեցնել առաջ ընթանալու կոնկրետ քայլերը եւ ապահովել անվտանգ, ապահով եւ բարեկեցիկ միջավայր՝ ի շահ տարածաշրջանի ողջ բնակչության»,- գրել է Պիտեր Ստանոն:
Հայտարարությունում նաեւ կողմերին կոչ է արվում մեղմելու հռետորաբանությունը եւ չսրելու լարվածությունը:
ԵՄ-ն կշարունակի իր ակտիվ ներգրավվածությունը
«Դեռեւս փխրուն միջավայրում, վերջին 30 տարիների վերքերը դեռ չբուժված, ԵՄ-ն կրկնում է իր կոչը կողմերին՝ մեղմելու իրենց հռետորաբանությունը եւ խուսափելու լարվածության ցանկացած անհարկի սրումից, ներառյալ զերծ մնալով միմյանց հասցեին սպառնալիքներից կամ մեղադրանքներից, ինչպես նաեւ ռազմական սադրանքներից եւ գործողություններից»,- գրված է ԵՄ հայտարարությունում:
Դիվանագետը շեշտել է, որ ԵՄ-ն կշարունակի իր ակտիվ մասնակցությունը խնդիրների կարգավորման գործընթացում:
«ԵՄ-ն կշարունակի իր ակտիվ ներգրավվածությունը՝ արձագանքելով երկու կողմերի ցանկությանը եւ նրանց աջակցելով չլուծված բոլոր հարցերի համապարփակ եւ արդար կարգավորման ուղղությամբ տարվող աշխատանքում, այդ թվում՝ Եվրոպական խորհրդի նախագահ Շառլ Միշելի, բարձր ներկայացուցիչ Ժոզեպ Բորելի, ԵՄ հատուկ ներկայացուցիչ Տոյվո Կլաարի անձնական ջանքերի, ինչպես նաեւ ԵՄ այլ մեխանիզմների միջոցով»,- նշվում է հայտարարությունում։