Ցեղասպանության կանխարգելման Լեմկինի ինստիտուտը մեծապես մտահոգված է ցեղասպանական հռետորաբանությամբ, որն Ադրբեջանի նախագահ Իլհամ Ալիեւն օգտագործել է իր վերջին ելույթներում, որտեղ նա կրկնել է Հայաստանի վրա հարձակում գործելու սպառնալիքները:
«Դատապարտում ենք Հաղթանակի օրվա ելույթներում Ադրբեջանի նախագահ Իլհամ Ալիեւի եւ Ադրբեջանի կառավարության հատուկ ցեղասպանական հռետորաբանության օգտագործումը։ Մեղմասությունները փորձում են քողարկել ցեղասպանական հռետորաբանությունը եւ դիտավորությունը: Միջազգային հանրությանը կոչ ենք անում դատապարտելու այս հռետորաբանությունը եւ պաշտպանել հայերին»,- նշված է Լեմկինի ինստիտուտի թվիթերյան գրառման մեջ։
Լեմկինի ինստիտուտը որպես օրինակ է բերում Ալիեւի այն խոսքերը, թե հայերին «ողբերգություն է» սպասվում, կամ թե «Ադրբեջանի համբերությունը սպառվում է»: Ինստիտուտը միջազգային հանրության ուշադրությունն է հրավիրում այս հռետորաբանության վրա՝ հայ ժողովրդի դեմ եւս մեկ ցեղասպանությունից խուսափելու համար: