Ըստ վրացական «Իմեդի» հեռուստաալիքի՝ Վրաստանը 2024-ի նոյեմբերին կավարտի Վերին Լարսի անցակետ տանող եւ տարածաշրջանում ամենաերկար ու աշխարհում ամենամեծ վեց թունելներից մեկի՝ Խաչի լեռնանցքի տակ 9 կմ երկարությամբ թունելի շինարարությունը:
Թունելը Մցխեթ-Ստեփանծմինդա-Լարս ավտոճանապարհի ամենավտանգավոր հատվածը (Գուդաուրի-Կոբի) շրջանցող ճանապարհի մի մասն է։ Հորատման մեքենան փորել է հիմնական թունելի 4 կիլոմետրը եւ տարհանման թունելի 3,5 կիլոմետրը: 15 մետր տրամագծով թունելը եռաշերտ է, երթեւեկությունն իրականացվելու է երկու ուղղությամբ։ Թունելի յուրաքանչյուր 500 մետրում տարհանման ելք կա։
Ավտոճանապարհը եղանակային պայմանների պատճառով տարեկան միջինը մոտ 90 օր փակ է կամ դժվարանցանելի մեծ բեռնատարների համար: Դա հանգեցնում է ոչ միայն դեպի Լարս տանող տարանցիկ շղթայի խախտմանը, այլեւ վրացական Ստեփանծմինդա բնակավայրի մի մասը կտրում է մյուսից։
Թունելի ու Կոբիից Քվեշեթ տանող 23 կիլոմետրանոց շրջանցիկ հատվածի շինարարության ավարտից հետո հնարավոր կլինի այդ տարածքով շուրջօրյա անխափան երթեւեկություն ապահովել դեպի Ռուսաստան:
Նախագիծը պետք է ավարտվեր 202-ին, սակայն համաճարակի պատճառով ժամկետը փոխվել է։ Նախատեսվում է կառուցել 22,7 կմ երկարությամբ ճանապարհ, ինչպես նաեւ 6 կամուրջ ու 5 թունել։ Նախագիծը Եվրոպայի ամենաբարդ ինժեներական կառույցներից է համարվում։ Խաչի լեռնանցքի տակ 9 կմ երկարությամբ թունելի կառուցման աշխատանքները սկսվել են 2021-ի սեպտեմբերին։